1/5/2016

Esti 30 d'abril a les 12 hores nel Muséu Marítimu d'Asturies na villa de Lluanco, tuvo llugar l'actu d'entrega d'una maqueta de la yá mítica goleta “Idus de Marzo” que partió de Candás, camín de la Antártida, en febreru de 1982, siendo ellaborada y apurrida pol tripulante y autor Félix Moreno. A la entrega asistieron Jorge Suárez Alcalde de Gozón, María Jesús Álvarez Conseyera d'Agricultura, Recursos Autóctonos y Pesca, y l'Alcaldesa de Carreño, Amelia Fernández, en representación del nuesu conceyu.

Tamién se cuntó con una numberosa representación social y política de dambos pueblos según más miembros d'aquella tripulación. Asistieron Alberto Vizcaino, actual Director de Pesca y espedicionariu naquella aventura, representantes de les asociaciones Candás Marinero y Cuatro Vientos, los maquetistes navales candasinos Zacarías de la Calle y Siro Fernández, Xuez de Paz de Carreño, ediles, representantes de l'Autoridá Portuaria d'Avilés y una representación de Capitanía Marítima.

Como agradecimientu y alcordanza, l'Alcaldesa de Carreño apurrió a Félix Moreno un llibru d'imaxes antigües de Candás editáu por Candás Marineru.

La espedición de la “Idus de Marzu” zarpó de Candás en febreru de 1982 siendo l'entamu de les esitoses investigaciones científiques españoles nel continente xeláu austral. Naquella ocasión fueron despidíos nel muelle de Candás, con música y celebraciones, por vecinos y vecines de Candás, peñes marineres, estudiantes de los centros educativos de Carreño y les autoridaes municipales de la dómina encabezaes pol antiguu Alcalde José Luis Vega.