25/4/2016

Esti llunes 25 d'abril a les 19 h. na Casa de Cultura de Candás abre al públicu la esposición de los trabayos resultantes de los cursos d'Estensión Cultural, edición 2015-2016, que promueve la Conceyalía de Cultura del Conceyu de Carreño.

"Nesta edición ufiertáronse un total de 37 acciones formatives de 20 temátiques distintes. Aumentando la ufierta de cursos y places pa persones de toles edaes (ufiertáronse 555 places). Llegando asina cada vez más llueñe nel oxetivu de promover la participación social, la educación, la formación y la cultura, y ameyorar la calidá de vida de les persones nel ámbitu municipal" -esplicó Cecilia Tascón, edil de cultura. 

"Cumplimos col oxetivu propuestu de diversificar la ufierta formativa pa tolos colectivos. Ufiertando cursos pa mocedá y per segundu añu consecutivu, caltúvose la ufierta pa persones con diversidá funcional" -añedió la Conceyala.

"La temática de los cursos foi amplia y variada. Cursos qu'impulsen les nueses tradiciones como cursos el de recuperación de la cultura tradicional: Danza prima y cancioneru candasín, cursu de confección de cobertores candasinos etc acciones formatives dedicaes a les nueves tecnoloxíes, pasando polos clásicos de Cocina, Cerámica, Pintura, Cueru, Artesanía Decorativa, o Talla de Madera. O los nuevos como Automaquillaje, que tuvo una gran acoyida" -prosiguió Tascón.

"Amás ufiertóse una mayor amplitú d'horariu. Atendiendo a los pidimientos de la ciudadanía programáronse cursos n'horariu de mañanes. La programación d'anteriores ediciones concentróse nes tardes. Nesta edición ufiertáronse 5 acciones formatives na vez de mañana, cola intención dar oportunidaes a persones que, por circunstancies personales, nun pueden allegar de tarde" -prosiguió la edil.

“Con esta esposición ponemos broche final a la edición 2015-2016. Dende la Conceyalía yá tamos trabayando na programación del nuevu cursu 2016-2017 pa dar respuesta a les moliciones de la ciudadanía. Anguaño, realizamos cuestionarios de valoración de los cursos ufiertaos. En base a les resultancies que refundien los mesmos vamos reformular, si fora preciso la nueva ufierta.” -señaló la Conceyala de Cultura.

La Esposición de los trabayos podrá visitase dende'l llunes 25 d'abril hasta'l 15 de mayu, dambos inclusive na Casa de la Cultura de Candás (cai Santolaya 9).

L'horariu va ser de llunes a sábadu de 19:00 a 21:00 hores. Domingos y festivos de 12:00 a 14:00 hores y de 18:00 a 21:00 hores.

Nel actu inaugural l'Alcaldesa de Carreño, Amelia Fernández va faer entrega al alumnáu de los diplomes qu'acrediten la so asistencia y participación nos cursos.