Na mañana d'esti domingu 17 d'Abril, na Plaza de los Hermanos Heliu, teniendo'l mar como telón de fondu y a pesar de la climatoloxía, dieron cita mediu centenar de motos clásiques procedentes de toa Asturies, na XV Concentración de Motos Clásiques de Candás.

Moteros de L.luarca, Ribesella, La Pola L.lena, Avilés, Grau, Xixón, ente otres localidaes dieron cita en Carreño. Nun faltaron tampoco motoristes de Gozón.

La concentración ta promovía pola Asociación Motorista Asturiana (AMCA). En dicha entidá tan presentes aficionaos a les clásiques de Carreño que participen viviegamente. Vecinos de Ambás, Tamón, Perlora, y El Regueral, ente otres parroquies carreñenses, son socios d'esta entidá ensin ánimu d'arriquecimientu destinada a la promoción y esfrute de les motocicletes clásiques.

Dende la so fundación, nel añu 1996, na asociación vienen desenvolviendo un importante llabor de divulgación del motociclismu clásicu, al traviés de les distintes actividaes que realicen como por casu, concentraciones como ésta por tola xeografía asturiana, nelles el públicu puede averase a contemplar y esfrutar pieces úniques.

La moto más antigua que participó n'esta concentración de Candás foi del añu 58 propiedá del gaiteru xixonés Iván Rionda Castro.

Tres la quedada en Candás a les 10 hores dieron un percorríu pela zona pa rematar la xornada con una comida d'hermandá nun restorán de Candás.