24/4/2016

La Xunta de Gobiernu Local aprobó una subvención por importe de 3.000 € pa la Fundación pa la Investigación con Célules Madre Uterines (FICEMU) pa siguir avanzando na promoción y  garantía del desenvolvimientu de les investigaciones científiques.

“Vistu'l pidimientu realizáu por FICEMU dende'l consistoriu de Carreño otorgóse-yos una ayuda estraordinaria pa collaborar, esta añalidá, nun proyectu de les llínees d'investigación alrodiu de les hUCESCs. Les hUCESCs son les conocíes como célules madre uterines y correspuende al so nome n'inglés human Uterine Cervical Stem Cells. Son unes célules qu'abren munchos campos d'investigación sobre'l cáncer. Llógrense de manera poca invasiva, a partir d'un cepilláu del cérvix uterín como'l que se realiza nes revisiones xinecolóxiques rutinaries. A partir d'esa amuesa realícense, nel llaboratoriu, distintos procedimientos que dexen la crecedera y proliferación de les mesmes célules”  –señaló Amelia Fernández, Alcaldesa de Carreño.

“Cola nuesa aportación municipal vamos ayudar a financiar los gastos derivaos del estudiu preliminar de la potencialidá del secretoma de célules madre uterines sobre la regulación de procesos bioquímicos del epiteliu pigmentariu de la retina. El principal oxetivu ye determinar el potencial d'el  MC-hUCESCs  na rexeneración  del epiteliu pigmentariu  de  la retina  y  na regulación  de  procesos  como  el  estrés  oxidativo  ya inflamación acomuñaos al mesmu”– añedió l'alcaldesa.

Tal que señaló'l director del Comité Científicu de la Fundación, el Doctor  Francisco Vizoso Piñero, Xefe de la Unidá d'Investigación de la Fundación Hospital de Jove, de Xixón, los estudios realícense in vitro sobre una llínea celular. Estúdiase'l MC-hUCESCs sobre distintos poblaciones de célules inflamatorias tantu de persones sanes como de persones con enfermedad auto-inmunes, amás de prosiguir col estudiu de la potencialidá del mediu condicionáu de les hUCESCs (MC-hUCESCs) nel cáncer de mama. Nel casu d'esti últimu estudiu, equí va evaluase la capacidá de controlar o tornar la crecedera tumoral del cáncer de mama tantu in  vitro como in vivo. Dicha llínea foi empecipiada fai más de 5 años, dando llugar a una publicación sobre la tema, pero preténdese, agora,  afondar nel efectu sobre los distintos fenotipos moleculares del cáncer de mama. A tal fin, en FICEMU van realizar un estudiu de la potencialidá del MC-hUCESCs na carcinomatosis del cáncer de colón y d'ovariu, y otru estudiu de la potencialidá del MC-hUCESCs na rexeneración ósea.