2/4/2016

La Rede Municipal de Centros d'Iniciativa Rural del Conceyu de Carreño sigue añediendo nuevos equipamientos a los mesmos. Llueu'l Centru d'Iniciativa Rural de Tamón va añedir dos nuevos espacios, el Chigre-Tienda y la Casa d'Acoyida de la Familia Ferroviaria.

Una vegada remate'l procesu de contratación alministrativa de xestión y esplotación integral d'estes instalaciones, el conceyu va consiguir nuevamente un doble oxetivu: per un sitiu, ampliar la ufierta de servicios al vecinderu y visitantes arriqueciendo'l puntu d'alcuentru y actividá que supon el Centru d'Iniciativa Rural municipal, y por otru, non menos importante na actual coxuntura, xenerar actividá empresarial y empléu estable nel mediu rural.  

L'equipamientu hosteleru Chigre-Tienda cuenta con una superficie de 237,90 m² y un aforu de 66 persones. Anque lo más singular y distintivu ye l'equipamientu cultural Casa d'Acoyida de la Familia Ferroviaria, con una superficie de 102,09 m² y un aforu de 50 persones, ta inspiráu na centenaria hestoria ferroviaria del conceyu de Carreño, supera la visión d'una esposición al usu de material ferroviario, pa centrar la so atención, y ende anicia la so novedá, na Hestoria Social xenerada pel mundu del ferrocarril: la hestoria de “los ferroviarios”, entendíos como un grupu social con unes connotaciones estremaes (la Familia Ferroviaria”).  

Va Ufiertar a quien la visiten itinerarios empuestos pel espaciu y les víes verdes del conceyu “ El Tranqueru” y “ L'Estratéxicu”, talleres didácticos y actividaes lúdicu-culturales, d'una manera didáctica y interactivo, una panorámica completa de la hestoria ferroviaria del conceyu y de la sociedá ferroviaria que xeneró a la so alredor. Por ello, los sos conteníos xiren en redol a tres eje temáticos: la hestoria de la Industrialización y el Ferrocarril en Carreño, la “Gran Familia” del “Carreño”, y una tercer exa dedicada a les Muyeres Ferroviaries”.  

Amás d'una interesante colección de fotografíes que van ilustrar el desenvolvimientu del ferrocarril nel conceyu, presentar al visitante vitrines con dellos materiales ferroviarios (uniformes, billetes antiguos de ferrocarril, acciones de la compañía del Ferrocarril de Carreño”, etc.), y videos interactivos con testimonios de les muyeres ferroviaries.

Va podese contemplar tamién 3 maquetes, qu'ilustren distintos detalles técnicos de la hestoria ferroviaria del conceyu: una maqueta de los distintos trazaos ferroviarios hestóricos de Carreño, otra maqueta del viaductu de Perán, ponte metálica de 45 metros de lluz (güei sustituyíu por una ponte de formigón), pol que'l ferrocarril salvaba'l ríu Espasa, en Perán. Y a lo último, una maqueta de la estación de Candás, llevantada a partir de los planos orixinales de la mesma, ilustrada pol visionáu d'un vídeu grabáu anguaño en dicha estación.