28/6/2016

L'Asamblea Xeneral de Naciones Xuníes decidió celebrar el 26 de xunu de cada añu'l día Internacional de la Llucha contra l'Usu Indebíu y el Tráficu Ilícitu de Drogues.  Nesta fecha, cada añu, la Fundación Cespa, de quien depende Proyecto Hombre, celebra  un alcuentru onde terapeutas, voluntariáu, persones usuaries, equipu directivu, representantes de grupos políticos y persones convidaes celebren una xornada de convivencia.

Na mañana d'esti 27 de xunu, na Quinta del Infanzón, alumnáu de la escuela de música de Carreño que dirixe David Colado actuó con un sestetu de guitarres. Esta actuación enmárcase dientro de la collaboración institucional que caltien el consistoriu de Carreño cola entidá promotora. Amás de la subvención nominativa que se destina nel presupuestu municipal, dende va años, les persones que moren temporalmente na comunidá apuerten, ente otros, al Centro Cultural Teatro Prendes, al Polideportivu, Centru de Dinamización Tecnolóxca Local, etc

Nel escenariu, coordinaos pola profesora de guitarra Noemí González protagonizaron la xornada dando l'ambientación musical del actu entamáu pola Fundación Cespa. Profesora y alumnáu nun ye la primer vegada qu'imparten recitales solidarios, a lo llargo d'ésti cursu, ensin dir más allá,  impartieron 6 conciertos en residencies xeriátriques de Carreño.

Coincidiendo cola celebración del Día Internacional de la Llucha contra l'usu indebíu y el tráficu ilícitu de drogues esta entidá, Proyecto Hombre, qu'empresta na nuesa contorna una respuesta solidaria y profesional a les drogodependencias  apurrió, na mañana de güei, la medaya de plata y diploma de la entidá a dos periodistes asturianes pol so compromisu al espublizar, nos periódicos rexonales pa los qu'escriben, cróniques sobre l'actividá que desenvuelve Proyecto Hombre y ponen altavoz a les problemátiques de drogadicción, alcoholismu y ludopatía.