30/6/2016

El Conceyu de Carreño acomete obres de meyora nesti espaciu emblemáticu etnográficu que figura nel inventariu de patrimoniu etnográficu municipal y que tamién ta incluyíu nel catálogu urbanísticu conforme a lo dispuesto na Llei 1/2001 de Patrimoniu Cultural d'Asturies, nel so artículu 74, relativu a la protección d'elementos d'interés etnográficu.

Asitiáu na cai Carlos Albu Kay, al altor del númberu 39, foi construyíu en 1799, nel sieglu XVIII, reedificado en 1871 y treslladáu definitivamente al llugar qu'ocupa.  La construcción ta adosada a un muriu que presenta un cuerpu de piedra de 3 m, compuestu por unos bonos sillares y perbién escuadrados. La parte cimera ta elegantemente coronada por 4 m de frontón d'influencia barroca, Coronáu llateralmente por dos pequeños pináculos con gustu neoclásicu que fueron añedíos na restauración de 1871.

“Dende'l puntu de vista turísticu ye un importante focu d'atracción, non yá pol so valor históricu y artísticu sinón tamién pol so raigón popular, a esti respectu esiste'l dichu popular que diz que  “L´agua de Santarúa, fai la xente aguda”. Ye, ensin dulda, un reclamu pa Candás y un esfrute pal vecinderu.“ – señaló  Simi Velasco, edil d'obres.

“Tamos acometiendo col serviciu d'obres llabories de caltenimientu, y actuaciones de meyora estructural y ornamental na fonte y el llavaderu axacente, pa solucionar dellos problemes de mugores  y ameyorar l'aspeutu xeneral” – prosiguió'l conceyal.

“P'ameyorar el funcionamientu tán realizándose los siguientes trabayos:

-Ante'l problema xeneráu en dellos momentos pol escesu de caudal que tresvierte ya invade la zona piatonal, va sustituyise les rexilles por otres que dexen mayor pasu de caudal y va realizase una impermeabilización del vasu de la fonte pa evitar la fuga d'agua que darréu remanez nes zones piatonales.

-Van asitiase unos tubos, a manera de goterón, pa evitar el rezumu de l'agua procedente del trasdós del muriu de contención esiste ente'l parque y la fonte y llavaderu.

-Va ameyorase la xunta esistente ente'l muriu de contención y el pavimentu del llavaderu por aciu una media caña de productos impermeabilizantes pa evitar la entrada d'agua al pavimentu y asina solucionar el problema de resbalones d'ésti espaciu.

-Van reparase los murios perimetrales de contención y paños del llavaderu con desconchones y va llevantase la base. Tamién se va a reparar el pavimentu de la zona del llavaderu p'ayudar a la impermeabilización y ameyorar.

-A lo último, van pintase los panales y barandielles” – concluyó'l conceyal d'obres.