26/7/2016

Los actos dieron empiezu cola misa oficiada a les 12 hores pol cura párrocu D. Jesús García, cantada por José Marcelino García acompañáu al órganu. Al términu  de la mesma tuvo llugar la procesión pola redoma del templu cola imaxe de Santiago. El Santu foi portáu por 4  vecinos de la zona: Agustín González,  Luis Fuentes, Miguel Ángel Fernández, y Carlos González

Tres la celebración relixosa celebrose la comida vecinal a les 14:30 h.  na pista polideportiva. Más 80 vecinos y vecines dieron cita nun ágape sirvíu por Margarita Blasco, rentera del Cir de Albandi y el so maríu Lolo, dambos rexenten el chigre de la parroquia. Na xornada vecinal participó l'Alcaldesa de Carreño y el teniente Alcalde. Al términu de la mesma hubo un sortéu de regalos ente persones asistentes.

Esta comida ye'l preámbulu de la celebración de fiestes del 13 al 14 d'Agostu entamaes pola entidá vecinal que preside Miguel Ángel Fernández. Ente les novedaes del programa  anguaño, nes fiestes, van realizar el domingu, día 14 d'agostu, a les 17:30 h una exhibición d'aeromodelismu con simulador y estáticu al cargu de la Escuela d'aeromodelismu "El Ferre" de Xixón. Conectaránse tamién los equipos de la L'Aldea Dixital de Albandi pa que los neños y les neñes que deseyen puedan practicar el xuegu colos aviones.  Mientres les fiestes todos los díes va haber costielles a precios populares y el llunes, día 15, paellada a partir de les 14:30 h.