En mayu del añu pasáu, el Conceyu de Carreño y la Fundación Asturiana d'Atención y Protección a persones con Discapacidáes y/o Dependencies (FASAD), roblaron un conveniu de collaboración pol que , a partir d'esi momentu, les persones usuaries del Centru de Sofitu a la Integración (CAI) de Candás pudieren aportar colos sofitos técnicos y personales necesarios a los servicios municipales (instalaciones deportives y socioculturales qu'hai nel conceyu).
Dende esi momentu, el Conceyu de Carreño y los Patronatos Municipales, PDM de Carreño, el Teatru Priendes y el Muséu Antón, comprometiéronse a xunir esfuerzos y sumar recursos públicos p'averar les sos instalaciones deportives y socioculturales a les persones qu'alleguen al CAI, col fin d'ameyorar la so integración ya insertamientu social nel conceyu, según el desenvolvimientu plenu de les sos facultaes y capacidaes culturales y humanes.
El CAI de Candás ta xestionáu pola Fundación ensin ánimu d'arriquecimientu FASAD. Esti equipamientu ye un recursu especializáu y abierto a la comunidá, dende onde s'ufierten programes personalizaos d'atención integral y formación a les persones adultes con discapacidá ente 18 y 50 años, pa favorecer la so integración sociu-llaboral y el so desenvolvimientu personal col oxetu de facilitar la so integración. Desenvuelve dellos programes ocupacionales, ximnasia, curiáu personal, avieyamientu positivu, desenvolvimientu de les habilidaes personal y social, y programes rellacionaos col ociu y tiempu llibre.
Frutu d'esti conveniu delles son les actividaes, pa esti últimu trimestre del añu 2016, que se programaron dende los distintos servicios municipales:
Síguese, dende'l CDTL Carreño Dixital, col trabayu formativu en materia tecnolóxica realizáu nel primer semestre del añu. Les actividaes van dar empiezu nel mes d'ochobre, los miércoles y vienres. El personal técnico municipal va trabayar l'acercamientu a les TIC d'esti colectivu, favoreciendo la so integración. La formación impartida ta empobinada, de tal forma, por que pueda llograse una formación inclusiva, basada nes capacidaes personales de cada asistente, teniendo en cuenta les sos característiques y el so nivel d'aprendizaxe.
Dende la Conceyalía Cultura, ufiertóse, dientro de los Cursos d'Estensión Cultural 2016/2017, el cursu de Cerámica pa Persones con Diversidá Funcional, los vienres de 17 a 18 hores. Hasta'l 7 d'ochobre les persones que tean comenenciudes van poder matriculase.
“Delles fueron les actividaes a lo llargo del añu programaes polos Servicios Municipales xuntu con FASAD. Asina por casu en collaboración col Patronatu Deportivu pudieron allegar a la piscina acomuñada; Nel muséu Antón participaron en dellos talleres, lo que se vio reflexáu na esposición colectiva “Dientro del Paisaxe” o nel mes de febreru l'alumnáu dio a conocer al restu de la ciudadanía les sos obres pictóriques na so primer esposición “Allegría” na Casa de la Cultura. Otros exemplos del llabor d'esti colectivu tener na realización de les flores del Xardín Inclusivu” de la Baragaña o na decoración con pieces de cerámica del estanque del Parque Les Conserveres, señaló Cecilia Tascón -Conceyala de Bienestar Social-.
Albandi
