L'Ayuntamientu
de Carreño, col fin d'amosar el so interés en too lo que concierne
a la infancia y adolescencia, na tarde d'ayeri, xueves 29, na sesión
plenaria aprobó definitivamente l'I Plan Municipal de la Infancia y
l'Adolescencia. Previu a l'aprobación definitiva tuvo sometíu a
esposición pública por que toa persona, qu'asina lo considerara,
realizara les aportaciones correspondientes al mesmu.
Carreño
foi un de los conceyos escoyíos por UNICEF pa la visita d'una
delegación, encabezada por Pablo Suárez Moro, Coordinador Técnicu
Autonómicu de UNICEF-Asturies.
La
evaluadora nacional axuntóse cola Alcaldesa y la conceyala de
Bienestar y Educación, tamién caltuvo una xunta técnica con
profesionales de les árees d'educación, infancia y desenvolvimientu
local. Finalmente visitó un centru educativu y entrevistóse con
grupos de neños y neñes que yá participaron nes visites y sesiones
plenaries infantiles. La visita d'evaluación producióse a lo llargo
de la mañana de güei, vienres 30 de setiembre.
“Con
esti Plan pretendese sentar les bases d'una política y unes
actuaciones concretes nesta materia, d'una manera efectiva , so la
premisa de considerar al neñu y la neña, como suxetu de plenu
derechu nel marcu de establecer na Convención sobre los Derechos de
la Infancia y Adolescencia” – afirmó Amelia Fernandez, Alcaldesa
de Carreño.
El
Plan de la Infancia y Adolescencia ye unu de les pilastres sobre los
que sofita'l sellu de Ciudaes Amigues de la Infancia (CAI) lideráu
por UNICEF. Esta iniciativa ye un preséu al serviciu de la promoción
ya implantación de los Derechos Humanos y la Convención sobre los
Derechos del Niño nos pueblos y ciudaes.
UNICEF,
per mediu del Sello Ciudá Amiga de la Infancia, reconoz y pon en
valor el trabayu a favor de la infancia realizáu nestos territorios,
representaos polos sos Gobiernos Locales.
El
Fondu de Naciones Xuníes pa la Infancia, naz en 1946 coles mires
d'atender les necesidaes de los y les menores n'Europa tres la II
Guerra Mundial. Dende'l principiu, la so vocación foi trabayar pola
infancia ensin distinción de raza, nacionalidá o relixón, y
asitiar la protección de los sos derechos percima de cualquier
interés.
A
partir de 1953 conviértese nun organismu permanente de les Naciones
Xuníes que'l so mandatu ye responder a les necesidaes de la infancia
y protexer los sos derechos. La so llabor básase na Convención
sobre los Derechos del Neñu (ONU, 1989), el tratáu de derechos
humanos más llargamente ratificáu del mundu, tando presente en más
de 190 países. La so acción desenvuélvese al traviés de les sos
oficines en tol mundu. En 1965 UNICEF recibe'l Premiu Nobel de la Paz
y en 2006 el Premiu Príncipe d'Asturies de la Concordia pol so
llabor a favor de la infancia y l'adolescencia precisada.
El
Programa CAI foi creáu por UNICEF Comité Español en 2001, col
propósitu de promover l'aplicación de la Convención sobre los
Derechos del Neñu (CDN) en pueblos y ciudaes de la xeografía
española. El Sellu CAI acredita que les polítiques d'infancia
que diseña y desenvuelve un conceyu tán realizándose acordies con
un procedimientu específicu. Anguaño esisten 115 conceyos n'España,
de los cualos 17 son asturianos, reconocíos col Sellu de Ciudaes
Amigues de la Infancia. Nesta visita d'evaluación l'Alcaldesa de
Carreño punxo de manifiestu'l compromisu del conceyu cola Infancia y
Adolescencia y l'oportunidá que-yos brinda tola metodoloxía de
trabayu que-yos apurre Unicef.
El
personal Técnico Municipal espunxo la so esperiencia nel trabayu
d'ellaboración del Plan. Les neñes y los neños que
realizaron aportaciones y xóvenes que participaron nel V Alcuentru
Autonómicu de Participación Infantil del Principáu d'Asturies
treslladaron les sos impresiones a la evaluadora.
A
metá del mes d'ochobre van dase a conocer los Conceyos reconocíos
col Sellu CAI (Ciudaes Amigues de la Infancia), Carreño aspira a
consiguir tal distinción y siguir ameyorando na prestación de
servicios públicos a la infancia y adolescencia.