Esti 21 d'Ochobre  arrincaron cola so presentación oficial nel Centru Polivalente de Candás, los Cursos d'Estensión Cultural 2016/2017.  

Nesta edición ufiertáronse un total de 37 acciones formatives de 18 temátiques distintes. Aumentando la ufierta de cursos y places pa persones de toles edaes (555 places). Llegando asina cada vez más llueñe nel oxetivu de promover la participación social, la educación, la formación y la cultura, y ameyorar la calidá de vida de les persones nel ámbitu municipal.   

Diversificóse la ufierta pa tolos colectivos ya intentóse averar la ufierta formativa a un colectivu más ampliu de persones como ye'l casu de la mocedá.  Por tercer añu consecutivu, caltiénse la ufierta pa persones con diversidá funcional.   

La temática de los cursos ye amplia y variada, asina por casu atopamos con cursos dedicaos a la recuperación de la cultura tradicional: Danza prima y  cancioneru candasín, según confección de cobertores candasinos o los dedicaos a les nueves tecnoloxíes, pasando polos clásicos de Cocina, Cerámica pa persones adultes, y los aún más clásicos como'l Cueru, l'Artesanía Decorativo, Talla de Madera.   

Amás tiense una mayor amplitú horaria. Atendiendo a los pidimientos de la ciudadanía programáronse cursos n'horariu de mañanes, la programación d'anteriores ediciones concentróse nes tardes. Nesta edición van realizase 5 acciones formatives na vez de mañana, cola intención dar oportunidaes a persones que, por circunstancies personales, non pueden allegar de tarde.   

“L'añu pasáu esmoleciónos que los cursos que la so temática va destinada a los menores non tuvieren abondes matrícules, sicasí pa esti nuevu cursu, el de pintura infantil tuvo abondes matrícules. Nel casu de talla de madera, dada la demanda de la población tuvimos qu'ufiertar otru cursu. Na zona rural tolos cursos van realizase con normalidá, sacante 'l Patchwork en  Prevera porque non hubo un mínimu de matrícules pal mesmu” -esplicó Cecilia Tascón, Conceyala de Cultura-.   

Los cursos que llograron el mayor númberu de matrícules anguaño fueron “Danza Prima y Cancioneru Popular” con 51 matrícules, siguiéndo-y de cerca “Confección de Cobertores” con 45. Llama l'atención que yá nun queden places pa un de los cursos que va tener el so empiezu en xineru del 2016, “Automaquillaxe”, que per segundu añu escosa les places en tiempu récord.   

L'entamu de los cursos va ser, dientro d'una selmana,  a partir del próximu llunes 24 d'ochobre de 2016,  el día que correspuenda según l'horariu previstu en cada cursu.   

“Pa los cursos que van dar empiezu a primeros del próximu añu (Telar Manual y Escritura Creativa), novedaes formatives, va volvese abrir el plazu de matrícula n'avientu. Amás de cara al 2017 tamos trabayando en poder ufiertar a la ciudadanía cursos formativos on-line. Una vegada que los tengamos delimitadas les temátiques va abrise , a primeros d'añu, un  nuevu períodu de matrícula” – prosiguió la edil.   

“A lo último, señalar que nos queden delles places sueltes en dalgún de los cursos yá convocaos. Son poques les disponibles, pero queda dalguna vacante, polo que si dalgún vecín o vecina despistóse y non se matriculó, si interésa-y dalgún cursu de los programaos puede dirixise al Ayuntamientu pa consultalo y ver si esiste disponibilidá pa matriculase” – concluyó Tascón.