Nuevamente'l conceyu de Carreño súmase viviegamente a la llucha contra'l cáncer. A pidimientu de la Xunta Provincial de l'Asociación Española contra'l Cáncer n'Asturies, qu'impulsa y entama Selmana Rosa, con motivu del Día Mundial del Cáncer de Mama.

"A lo llargo d'esta Selmana, ente'l 19 y el 28 d'Ochobre, vamos sumanos actos previstos na mayor parte de les localidaes d'Asturies, dirixíos a espublizar les actividaes que la AECC  desenvuelve en favor de pacientes y familiares, y sensibilizar y solidarizar, especialmente mientres esos díes, a la sociedá asturiana con esta causa, el cáncer de mama, que cada vez afecta a más muyeres y homes de la nuesa rexón" -esplicó Cecilia Tascón, edil de Bienestar.

"Atendiendo al pidimientu que nos formularon dende la AECC asitiemos el llazu rosa nel edificiu del antiguu Consistoriu local  (Antiguu Conceyu) y vamos tiñir de rosa l'agua d'una fonte del conceyu. Concretamente la del Parque Les Conserveres va llucir asina a partir d'esti sábadu a les 13 h." -prosiguió Tascón.

"Estes collaboraciones cola llucha contra'l cáncer caltienen tol añu con acciones preventives y de sensibilización con charres divulgatives nel marcu de la Estratexa de salú y sofitando les campañes, recaldando fondos pa  esti fin.  Esti branu collaboramos, a iniciativa d'una neña de Candás,  Olaya Longo, con una gymkana infantil solidaria. En poques hores  recaldóse en Candás 331 euros d'esta actividá que pretendió sensibilizar a neños y neñes y fomentar vezos saludables, importe  donáu íntegramente pa esta causa. Esti sábadu,  vamos tar sofitando la encuestación que va faer la AECC so la coordinación de María Antonia Morales 'Toñi", Vocal de la AECC en Carreño.  Ellí vamos tar collaborando  dende los once de la mañana nun stand na Plaza de la Baragaña " -añedió la conceyala.

"Tratamos de sumar esfuerzos colectivos pa  consiguir una verdadera Marea Rosa n'Asturies como símbolu de sofitu y solidaridá coles persones afectaes por esta enfermedá y la llucha contra la mesma, que dende la AECC llevar a cabu, especialmente al traviés de los fondos dedicaos a la investigación qu'anguaño, en términos globales,  xubieron a 8 millones d'euros" -concluyó la edil Cecilia Tascón.