L'Asamblea Xeneral de l'Asociación pal Desenvolvimientu Integráu del Centru d'Asturies Periurbano (ADICAP), que engloba a los conceyos de Carreño, Gozón, y la zona rural de Corvera y Llanera, aprobó, na mañana d'esti 1 d'avientu, la propuesta de bases pa la convocatoria d'ayudes Leader del añu 2017 correspondiente al Programa de Desenvolvimientu Rural 2014-2020 del Principáu d'Asturies.  

La nueva convocatoria tendrá de ser agora validada pola Conseyería de Desenvolvimientu Rural y Recursos Naturales pa la so publicación nel BOPA  a principios del próximu añu.   

La convocatoria pa l'añalidá de 2017 va tener un presupuestu de 206.475 €, d'ellos 69.705 € van ser pa conceder subvenciones a empreses privaes, 20.932 € pa Conceyos y 15.838 € pa entidaes ensin ánimu d'arriquecimientu.   

La convocatoria inclúi, amás, dotación económica pa proyectos tresañales que se vaigan a executar nos años 2018 y 2019. Nel casu de l'añalidá  2018 hai un presupuestu de 263.376 € (227.947 € pa empreses privaes, 23.018 € pa entidaes locales y 12.411 € pa entidaes ensin ánimu d'arriquecimientu) y pa l'añalidá 2019 un total de 272.457 € (235.807 € pa empreses privaes, 23.812 € con entidaes locales y 12.838 pa entidaes ensin ánimu d'arriquecimientu).   

La convocatoria 2017 va tener dos plazos pa la presentación de solicitúes dende la publicación nel BOPA, el primeru va rematar el 30 d'abril y sol principiu de la concurrencia competitiva van axudicase les ayudes de les solicitúes tramitaes y el que podrá concedese a lo más hasta'l 70% del presupuestu de la convocatoria. El segundu periodu pa la presentación de les solicitúes d'ayuda va dir dende'l zarru del primer periodu hasta'l 30 de setiembre de 2017 y van concedese ayudes por un importe de siquier el 30 % del presupuestu de la convocatoria más los remanentes que pudieren quedar del primer periodu. Les inversiones tendrán de tar xustificaes a 15 de noviembre.   

Tolos beneficiarios de les ayudes Leader van tener la posibilidad d'usu de les condiciones financieres que la Caja Rural d'Asturies estableció con motivu del conveniu de collaboración qu'apocayá robló cola Rede Asturiana de Desenvolvimientu Rural (READER).