“Dende l'equipu de gobiernu
tresllademos a la mesa de negociación una propuesta de
reorganización parcial de la plantiya municipal centrada nel
refuerzu de servicios básicos. Encetamos esti refuerzu nuna primer
fase, previa a una restructuración municipal global que se va
estudiar a lo llargo d'esta añalidá”, esplicó Gabriel
Rodríguez, conceyala de personal de Carreño.
El responsable de personal del
Consistoriu de Carreño añedió que “el serviciu municipal
d'obres, servicios sociales y la biblioteca van ser los principales
destinatarios d'esta propuesta de reorganización parcial que se
concreta na cobertoria de forma interina, siguiendo'l criteriu que
marca la lexislación vixente, y la dotación presupuestaria de les
siguientes places:
- 3 operarios/es y 1 oficial pintor
pa sofitar el serviciu d'obres.
- 1 plaza de Trabayador/a Social pa
reforzar el desenvolvimientu de polítiques de bienestar social ya
igualdá.
- 1 plaza Aux. de Biblioteca a media
xornada como refuerzu pal serviciu d'atención y actividaes de la
biblioteca pública municipal”.
La propuesta tamién busca la creación
de dos nueves places. “Siguiendo la evolución normativa en
materies como la tresparencia y les nueves tecnoloxíes y tratando
d'afaer la plantiya esistente a la nueva realidá de l'alministración
local plantégase la creación d'una xefatura de sección de
tecnoloxíes de la información y la comunicación, tresparencia y
participación ciudadana y otra de recursos humanos”, esplicó
Gabriel Rodríguez.
La xefatura de la sección TIC,
Tresparencia y Participación Ciudadana atiende a la entrada a valir
de la llei 19/2013 de tresparencia y bon gobiernu lo mesmo que de les
Lleis 39 y 40 de 2015, pa lo que se precisa reorganizar el
funcionamientu municipal y dotalo de más recursos humanos que puedan
faer frente a les nueves esixencies llegales. Nesti casu propón una
adscripción temporal a dichu puestu d'una funcionaria qu'hasta agora
exercía llabores informátiques. Y cubrir cola correspondiente
cobertoria temporal y dotación presupuestaria la plaza de Técnicu/a
informáticu/a p'avanzar na implantación de l'alministración
electrónica y tresparencia.
La xefatura de la sección de Recursos
Humanos surde de la reordenación de la plantiya actual y polo tanto
nun supondría la incorporación de nuevos efectivos.
Nel intre de la mesa de negociación
encetáronse otres cuestiones relatives a axustes na relación de
puestos de trabayu, ente elles l'axuste del complementu de
destín y complementu específicu de los funcionarios de la policía
municipal, que quedó a espera de valoración xurídica previa al
alderique de la cuestión pol plenu municipal.
N'espera de la reorganización completa
queden igualmente les reivindicaciones relatives al personal auxiliar
y alministrativu d'oficines, y les referíes a les xefatures d'equipu
del serviciu d'obres.
Albandi
