El voceru del gobiernu local, Gabriel
Rodríguez, salió al pasu de les acusaciones del voceru del Partíu
Popular en Carreño sobre la contratación municipal.
“En nengún casu la contratación
efectuada dende'l Consistpriu de Carreño ye illegal”, afirmó.
“El voceru del Partíu Popular
conoz la realidá de la contratación municipal, si tien dalguna
varita máxica que dexe contratar con más rapidez sería deseable
que punxera la so conocencia en favor de la entidá que representa
por mandatu ciudadanu. D'otra manera podría considerase enxitosu yá
que taría dexando que ciertos suministros cuesten más a los
carreñenses”, señaló'l voceru del gobiernu.
“A lo llargo de los últimos años,
el gobiernu socialista dio pasos firmes n'ares d'amenorgar el gastu
corriente al llicitar servicios y suministros. Axudicóse apocayá'l
serviciu de telefonía móvil, el serviciu de xestión de depuradores
(EDARS) y el material eléctricu. Ye más, mientres les
últimes selmanes, l'Alcaldesa treslladó al restu de grupos
políticos, nel marcu de les rondes negociadores del presupuestu
municipal l'oxetivu previstu de rebaxar en un 1,5 per cientu el
gastu corriente, un aforru que xube a 73 mil euro y que va consistir
na llicitación de dellos suministros municipales como'l
combustible pa vehículos, y el suministru eléctricu, ente otros”,
esplicó Gabriel Rodríguez.
En relación al suministru d'enerxía,
na actualidá esisten contratos cola empresa suministradora EDP pa
cada contador. P'avanzar na llicitación global de too el suministru
embaraxaronse delles opciones, dada la dificultá de la ellaboración
d'un pliegu técnicu d'esi montante pa un Conceyu del nuesu tamañu y
son unos servicios de suministru por casu de más de 8.500 puntos de
lluz y doscientos cuadros de mandu. P'amenorgar costos
embaraxóse, per un sitiu, a propuesta del grupu políticu SOMOS que
propunxo la compra d'enerxía verde. Y por otru, a fórmula
d'alcuerdos marco o centrales de compres que tien la Federación
Asturiana de Conceyos y la Federación Española de Conceyos y
provincies. A los dos centrales de compres esistentes a nivel rexonal
y local el Ayuntamientu de Carreño xuntóse yá l'añu pasáu. Ensin
qu'ello dexara resolver la llicitación del pretendíu suministru.
Les centrales de compres, con muncho
más personal técnicu que'l Conceyu de Carreño (que tien una
técnica responsable de la área de contratación) entá nun
tienen axudicaos munchos de los pretendíos contratos. Por ello,
entá nun pudimos contratalo n'esta vía. Ye más nel casu del
suministru eléctricu analizóse la fórmula de la Federación
Española de Conceyos y Provincies, quien tien contratáu esti
suministru con dos empreses pa la península pero analizaos tolos
datos locales: esto ye facturación del Conceyu de Carreño y precios
ufiertaos, comprobóse qu'estos postreros yeren muncho más elevaos
que los precios que se vienen pagando en Carreño. Por ello, los
técnicos municipales desaconseyaron usar dicha fórmula porque nun
s'aforraría no que se paga de factura de lluz.