La Conseyería d'Educación, Cultura y
Deporte del Principáu d'Asturies otorgó al Ayuntamientu
de Carreño una subvención de t3.638,3€ destinaos a la Escuela
Municipal de Música “Miguel Barrosa“.
L'artículu 27 de la Constitución
Española inclúi ente los derechos fundamentales de la persona'l
derechu a la educación, disponiendo la obligación de los poderes
públicos de garantizar el cumplimientu del so exerciciu por aciu una
programación de la enseñanza na que participen tolos sectores
qu'integren la comunidá educativa y que coles mesmes cumpla los
principios d'eficiencia y economía.
“Les enseñances artístiques,
polo xeneral, y les musicales en concretu, tienen n'Asturies una
amplia ufierta formativa, considerando de forma especial a los
estudios musicales con validez académica oficial, según a les
enseñances rellacionaes cola música y la danza tradicional
asturiana. La ayuda percibida pola nuesa Escuela va contribuyir al so
caltenimientu, y a favorecer la igualdá d'oportunidaes nel accesu a
esti tipu d'enseñances en tol territoriu asturianu. “ - señaló
Cecilia Tascón, Conceyala d'Educación.
Mientres el presente curso escolar, más
de 200 persones tán cursando los sos estudios na Escuela
Municipal de Música “Miguel Barrosa”. La formación que
s'imparte na Escuela puede estremase en tres clases:
Música y Movimientu. Esti ámbitu
formativu ta dirixíu puramente a los neños y neñes d'edaes
entendíes ente los 4 y 7 años, col fin d'atender, con un
tratamientu pedagóxicu específicu, el descubrimientu y
desenvolvimientu de les capacidaes espresives, musicales y motrices
que dexen darréu la elección d'un instrumentu y una práctica
gociosa y convincente d'esta actividá artística.
Enseñanza Reglada. Les
enseñances artístiques de música, tienen como finalidá
apurrir al alumnáu una formación artística de calidá y garantizar
la cualificación de los futuros y les futures profesionales de la
música. Tán dirixíes a aquelles persones que tienen interés en
convertise en profesionales y, polo tanto traen una ciertu oxetivu
llaboral; estes enseñances cúrsense nos Conservatorios y Centros
autorizaos pola Alministración Educativa y faen posible una
titulación oficial.
Enseñanza ensin reglar. Ye la
enseñanza impartida nuna Escuela de Música que trata de dar al
alumnáu, ensin llende d'edá, una educación nun suxeta a la
esixencia de programes. Estes enseñances nun porten el llogru de
títulos con validez académica o profesional y los sos currículos
nun tán regulaos pola Alministración Educativa.
“Cola aportación rexonal
cofinancióse l'alquisición de llibros y partitures, l'alquisición
d'instrumentos pal Bancu de la Escuela, arriendu, y material
d'oficina, ente otros gastos” - concluyó la Conceyala.
Albandi
