El salón de plenos del Ayuntamientu acoyó les presentación de les XIV Xornaes de Coeducación que van desenvolvese nos centros educativos del conceyu, IES Candás, CP San Félix y CP Poeta Antón.
Les Xornaes de Coeducación plantéguense como una ferramienta que va dexar y facilitar la sensibilización, reflexón, prevención y promoción de la igualdá d'oportunidaes nesi gran llaboratoriu que ye la Educación.
Los conteníos van articulase na rotura d'estereotipos sexistes col fin de cuestionar el procesu de socialización diferencial de xéneru y contribuyir a que se fortalezan nueves formes de relación ente los mozos y les moces.
Por ello:
- Tómase a tol alumnáu de los centros escolares, dende la Educación infantil hasta 1º de Bachilleratu.
- Incorpórense nueves entidaes collaboradores polo que la propuesta d'actividaes ye más amplia y variada
- Los talleres realícense, siempre que sía posible, col grupu d'aula, nun entemeciendo nin xuntando clases yá que la metodoloxía vese enzancada si son munchos o si hai “estraños”
El planteamientu de los talleres va basase nuna metodoloxía constructivista, partiendo de la conocencia de cada grupu y creando un espaciu d'aprendizaxe, analís y reflexón. Los conteníos de trabayu en cada taller van presentar d'una forma activo y dinámico onde l'alumnáu va ser el protagonista de les sesiones.
La forma de trabayu ye altamente participativa utilizando actividaes, exercicios y dinámiques que sían d'interés pal alumnáu y que los ayuden nun trabayu de reflexón. Ferramientes lúdiques (técniques de dinamización grupal) y artístiques van ser les qu'ayuden a la reflexón y la xeneración de propuestes per parte de mocedá participante. Amás, búscase la implicación, na midida de lo posible, de les families y el profesoráu por aciu pequeñes xeres a realizar polos mozos y moces tres les sesiones.
Nesti actu l'Alcaldesa señaló
“ La desigualdá ente muyeres y homes ye la principal causa de la violencia de xéneru en cualesquier de les sos formes (psicolóxica, sexual, física...) Decímoslo bien de vegaes y nun vamos cansar de repitilo y, nesti sentíu, la educación xuega un papel fundamental na construcción d'una ciudadanía igualitaria. Los centros educativos nun son un espaciu neutral. Nellos tresmítense valor, conocencies, actitúes, modelos y estereotipos por aciu un procesu d'enseñanza-aprendizaxe formal ya informal. Nesti escenariu pueden llegase a reproducir actitúes y conductes que, de manera tapada, favorecen un tratu desigual ente mozos y moces por motivos de xéneru, y nesi sentíu estes xornaes van ayudar a llograr ferramientes al profesoráu pa evitalo “
Albandi
