El Conceyu de Carreño, al traviés de
la Conceyalía de Festexos, y la SGAE lleven meses trabayando na
concreción d'un posible un conveniu local en beneficiu de les
fiestes populares de Carreño. De concretase, les comisiones de
festexos podríen llograr una bonificación nes sos actividaes. El
derechu d'autor ta recoyíu pola Llei de Propiedá Intelectual y la
so reconocencia ye inexcusable pa toa aquella entidá (con
independencia de la so naturaleza) qu'entame un eventu onde
s'interprete repertoriu protexíu.
Na tarde de güei, van caltener un
alcuentru responsables municipales y Comisiones de Fiestes y
asociaciones vecinales qu'entamen fiestes patronales nel conceyu.
Esta xunta informativa va celebrase a les 20:00 hores nel Salón de
Plenos del Conceyu. A ella, van asistir l'Alcaldesa de Carreño,
Amelia Fernández, la conceyala de Festexos, Paula Cuervo, y el
coordinador de Festexos y Cultura, Alain Fernández.
"Dende la área de festexos del
Conceyu caltuviéronse alcuentros cola SGAE pa poder llegar a un
alcuerdu al respective de les tarifes qu'anguaño se vienen aplicando
a organizadores de programes festivos nel nuesu conceyu" -
comentó la conceyala de la área Paula Cuervo.
"Somos conscientes de les
dificultaes que tienen les comisiones y asociaciones pa llevar a cabu
les fiestes, y l'esfuerzu económicu que-yos supon, por eso dende
l'equipu de gobiernu vemos necesariu un alcuerdu cola SGAE pa
garantizar un amenorgamientu na tarifa que nueses comisiones y
asociaciones vienen pagando toos estos años" - concluyó la
conceyala.
“Con un marcu d'alcuerdu
contribuyiríamos activamente a la protección de les fiestes de les
distintes parroquies, que son una pieza clave dientro del texíu
asociativo de Carreño. Les entidaes faen un gran llabor y trabayen
enforma pa sacar alantre les fiestes y ye un llabor que tenemos
qu'estimar y reconocer. Amás de collaborar coles ferramientes de les
que disponemos nel consistoriu” – esplicó l'Alcaldesa de
Carreño.
Amás, la rexidora recordó que dende'l
consistoriu siguirá collaborándose, económicamente colos recursos
y medios disponibles, pa facilitar a les asociaciones la organización
de les fiestes parroquiales. La convocatoria d'ayudes municipales
prevista pa tal fin yá ta abierta. Dispon d'un presupuestu de 32.000
€ al que van optar, en concurrencia competitiva toles entidaes que
– cumpliendo los requisitos previstos nes bases - faigan fiestes
en Carreño. El plazu pa solicitar tales subvenciones conclúi'l 6 de
Xunu