Esti Sábadu, a partir de les 11 hores
en Candás va celebrase l'Asamblea de l'Asociación d'Archiveros y
Xestores de Documentos del Principáu d'Asturies (AAPA) na
Biblioteca Municipal “González Posada” na Cai Enrique Alau, see
tamién del Arquivu Hestóricu Municipal.
“Cumpliendo'l dictáu de los sos
estatutos y nun exerciciu de tresparencia, la AAPA axúntase pa
rindir cuentes de la so actividá mientres l'últimu añu y
consensuar les llínees de trabayu del siguiente exerciciu, nun
momentu de máxima actividá profesional” – esplicó
Fátima Rodríguez Coya, Presidenta de la entidá.
“La elección del Conceyu de
Carreño como see pa la celebración d'esti actu constitúi'l sofitu
y reconocencia de la AAPA a un conceyu que fai agora quince años,
apostó por un serviciu d'arquivu profesional que foi modelu pa
otros, cola definición de la figura d'archivera acomuñada. Nestos
momentos de fonda reforma de les alministraciones públiques escontra
un contestu dixital, más abiertu y participativu, creemos que puede
siguir siendo una alternativa vidable pa cumplir coles obligaciones
llegales que'l so cumplimientu nun ta siendo posible na mayoría de
los pequeños conceyos asturianos” – concluyó Rodríguez
Coya.
“Tres l'asamblea, programada a les
12.00 h. van realizar una visita al Arquivu Municipal de Carreño,
empuestos pola archivera de la Mancomunidá de Cabo Peñes
responsable de la so xestión, M ª Carmen Cantero. Van Empezar pela
parte destinada a documentos históricos, na mesma Casa d'Alau, pa
darréu movese a ver la parte alministrativa na see del Ayuntamientu
de Carreño (llegada a les 12.30 h). Al términu d'ésta sobre
les 13.15 h. van visitar a la Esposición Permanente de la Industria
Conservera de Candás, empuestos por personal de la Oficina de
Turismu” – esplicó l'Alcaldesa de Carreño.
“Cada vez ye mayor el grau de
concienciación social ya institucional sobre la trescendencia d'una
fayadiza xestión de documentos pal exerciciu de derechos, el
desempeñu de les persones y les organizaciones. Carreño lleva años
trabayando por ello. Dende'l Consistoriu local, como nun diva ser
d'otra manera, estimamos que la AAPA escoyere el nuesu
conceyu pa realizar la so asamblea añal, según destacamos la
disposición y collaboración emprestada peles distintes árees y
servicios municipales por que esta actividá sía posible. Mención
especial, si quepe, a la nuesa archivera Carmen Cantero, non yá
por ayudar colos preparativos d'esti alcuentru, sinón pola so sólida
implicación pa da–y visibilidá al compromisu del conceyu col
arquivu y la xestión de documentos “ – añedió la rexidora.