El pasáu xueves 18 de mayu conmemoróse, en tol
mundu, el Día Internacional de los Museos (DIM), Carreño sumóse a
esta iniciativa col entamu de delles actividaes nel Centru
d'Escultura Muséu Antón y na Casa d'Acoyida de la Familia
Ferroviaria.
El Día Internacional de los Museos ye un eventu
coordináu pol Conseyu Internacional de los Museos (ICOM). La
designación de tal día foi la resultancia del resolvimientu
tomáu na XII Asamblea Xeneral del ICOM en Moscú en 1977. Cada añu
escuéyese un tema p'apigurar en redol a él les iniciatives que
s'entamen en toles instituciones onde se celebra.
El Conseyu Internacional de Museos, creáu en
1946, ye una organización non gubernamental, dependiente de la
Organización de les Naciones Xuníes pa la Educación, la Ciencia, y
la Cultura. Agrupa a museos y profesionales, y ta dirixíu al
caltenimientu y comunicación del patrimoniu natural y cultural del
mundu, presente y futuru, tanxible ya intanxible.
“El lema d'anguaño 2017 ye “Museos y
hestories revesoses: dicir lo indicible en museos”. Esta tema
resalta'l papel de los museos que, poniéndose al serviciu de la
sociedá, pueden convertise en centros de pacificación de les
relaciones ente los pueblos. De cómo l'aceptación d'un pasáu
doliosu constitúi un primer pasu pa imaxinar un futuru común sol
signu de la reconciliación” señaló
Cecilia Tascón – Concejaya de Cultura.
Esta fin de selmana, na Casa d'Acoyida de la
Familia Ferroviaria sita nel Centru d'Iniciativa Rural de Tamón sábadu a partir de les 17 hores van llevase a cabu una serie
d'actividaes empobinaes principalmente al públicu infantil. El
taller “Carreño y el Tren” , al traviés del cual van
aprender a conocer, respetar, valorar el ferrocarril como una parte
importante de la nuesa sociedá.