Esti xueves 18 de mayu celebrase en too'l mundu el Día Internacional de los Museos (DIM), Carreño xúnese a esta iniciativa col entamu de varies actividaes mientres el fin de selmana.

El Día Internacional de los Museos ye un eventu coordináu pol Conseyu Internacional de los Museos (ICOM).  La designación de tal día  foi la resultancia de la resolución de la XII Asamblea Xeneral del ICOM en Moscú  1977. Tolos años escueyese un tema pa entamar alredor de él les iniciatives que se entamen en toles instituciones onde se celebra.

El Conseyu Internacional de Museos, creáu en 1946, ye una organización non gubernamental, dependiente de la Organización de les Naciones Uníes pa la Educación, la Ciencia, y la Cultura. Reune a museos y profesionales, y ta dirixío al caltenimientu y comunicación del patrimoniu natural y cultural mundial, presente y futuru, tanxible e intanxible.

“El lema d'anguaño 2017 ye “Museos y hestories revesoses: dicir lo indicible en museos”. Esti tema resalta'l papel de los museos que, poniéndose al serviciu de la sociedá, pueden convertise en centros de pacificación de les relaciones ente los pueblos. De cómo l'aceptación d'un pasáu doliosu constitúi un primer pasu pa imaxinar un futuru común sol signu de la reconciliación” señaló Cecilia Tascón – Conceyala de Cultura.

Les actividaes programaes pa la celebración d'esti Día son les siguientes:

Nel Centru d'Escultura de Candás Muséu Antón, van tener llugar dos actividaes:

1.El xueves 18 de mayu a les 19:30 hores la conferencia “El escultor Antonio Rodríguez García, Antón” al cargu de Dolores Villameriel Fernández, directora del Muséu.

Esta conferencia, la tercera, encuádrase dientro del ciclu de 6 Conferencies “Alcuentros col Arte” que van tener llugar mientres too'l añu.

2.El sábadu 20 de mayu a les 19:00 hores, el tercer Conciertu de Música de Cámara dientro del IV Ciclu de Primavera interpreáu pol alumnáu del Conservatoriu Profesional Julián Orbón d'Avilés.

Na Casa de Acoyida de la Familia Ferroviaria sita nel Centru d'Iniciativa Rural de Tamón.

El sábadu 20 de mayu a partir de les 17:00 h. entámense una serie d'actividaes dirixíes principalmente al públicu infantil. El taller “Carreño y el Tren” , al traviés del cual van aprender a conocer, respetar, envalorar el ferrocarril como una parte importante de la sociedá.