Los díes 20 y 21 de mayu la ARMH
n'Asturies lleva a cabu dos exhumaciones de manera
simultánea. Los trabayos van tienen llugar nuna fuesa común conocida
como «Les Candases», alcontrada nel campusantu parroquial de
Bañugues (Gozón) y na denominada «La Canalona», allugada na
cuneta d'una carretera cercana a Agones (Pravia).
En Bañugues espérase atopar los
restos de trés muyeres de Candás, obreres conserveres o vendedores
de pexe, devueltes pel mar en siendo asesinaes nel Cabu Peñes el 2
de xunu de 1938. Nun fueron les úniques víctimes, yá que mientres
esa mesma xornada tamién fueron secuestraes otros cinco muyeres y
otros tantos homes, sufriendo toos ellos el mesmu mortal destín.
La investigación, que remató con un
avolumáu dossier, dexa conocer les identidaes de les ocho muyeres
asesinaes. Sicasí, non podrá estremase la identidá de los trés
que fueron soterraes en Bañugues, polo qu'una vegada rematada la
exhumación la identificación de los restos va tener que realizase
con pruebes d'ADN.
La otra fuesa común na que tán
faciendo una intervención ta asitiada en Agones (Pravia), nella
créese que tán soterraos los hermanos Manuel y
Ángel Fernández Suárez, de 31 y 20 años d'edá. Estes
aballadores xeres de exhumación cuerren al cargu de voluntarios y
voluntaries de l'Asociación pa la Recuperación de la Memoria
Histórica y la Sociedá de Ciencies Aranzadi. Formen parte del
equipu de trabayu más de 40 persones: arqueólogos, auxiliares,
historiadores, psicólogos, documentalistes etc, que van tar dirixíos
pol prestixosu forense, Francisco Etxebarría y el presidente de la
ARMH, Emilio Silva.