Dientro del programa Joven Ocúpate, va dar empléu a mozos mientres 6 meses a la vez que se formen na ocupación d'ayudante d'arbañil.

El Conceyu de Carreño empecipió esti llunes 3 de xunetu, la puesta en marcha del proyectu Carreño Inclusivu nel marcu del programa Joven Ocúpate, financiáu pol serviciu públicu d'empléu del Principáu d'Asturies. Trátase del primer programa Joven Ocúpate que pon en marcha'l Conceyu de Carreño nel presente mes, que va dar na contratación de 4 mozos y moces en desempléu mientres 6 meses, a los que simultáneamente va formáse-yos na ocupación d'ayudante d'arbañil.

Los participantes nesti proyectu tienen ente 16 y 29 años, tán inscritos nel Sistema Nacional de Garantía Xuvenil, y lleven más de 6 meses en desempléu. Na selección tuvo prioridá la mocedá que nun superare la Educación Secundaria Obligatoria (ESO).

Los participantes nel proyectu fueron contrataos por aciu la modalidá de Contratu pa la Formación y l'Aprendizaxe mientres los 6 meses de duración del proyectu, y van recibir la formación del Certificáu de Profesionalidá Operaciones auxiliares d'acabaos ríxidos y urbanización, que les sos práctiques van consistir na realización de distintes actuaciones p'amenorgar barreres qu'atopen les persones de ciertos grupos vulnerables (discapacitaos/es, vieyos/es, etc.) nel so desempeñu diariu. Ente diches acciones atopen el rebaxe de ceres en pasos de peatones, l'adecuación de places d'aparcamientu pa persones con movilidá amenorgada, la creación de ramples pa l'accesibilidá a espacios públicos singulares  la instalación d'espacios biosaludables pal exerciciu de persones mayores en distintos puntos del conceyu, por casu, en Perán y na Vía Verde d'El Tranqueru, etc.

La mocedá beneficiaria tamién va recibir formación complementaria pa llograr el títulu de Graduáu n'ESO.