La ONG Global Humanitaria presenta la esposición familiar ‘Los derechos de la infancia’ en Candás, que va tener llugar nel Centru Polivalente del 17 al 30 de xunetu, nos horarios habituales d'apertura del mesmu.

El derechu a la salú, a la educación, a la protección, a la familia, a la igualdá… son solo dellos exemplos de los derechos reconocíos dende l'añu 1989 para tolos neños y neñes del mundu.

La esposición ta integrada por 10 paneles enrollables que resume con ilustraciones la Convención de los Derechos de la Infancia de Naciones Xuníes (1989), el tratáu internacional más llargamente ratificáu de la hestoria. Cada unu de los derechos ta presentáu por Globalita, la imaxe de Global Humanitaria.

Esta Convención ye la primera que considera a los neños y neñes como suxetos de derechos que tienen de ser protexíos individual y colectivamente pola acción de cada persona adulta, Instituciones y axentes gubernamentales ya Internacionales.

Los derechos reconocíos na Convención falten enforma de ser una realidá. Más de 650 millones de neños en tol mundu viven en condiciones de probeza estrema y nun pueden aportar a derechos como la identidá llegal, la protección de la salú, la seguridá alimentaria y l'educación universal.

Global Humanitaria ye una organización independiente que trabaya pa garantizar los derechos de la infancia y les sos comunidaes, especialmente nos sectores d'educación, salú y seguridá alimentaria. Ye una de les entidaes coles que'l Conceyu de Carreño vien trabayando en Cooperación al desenvolvimientu. Dende 1999, Global Humanitaria punxo en marcha más de 650 proyectos de desenvolvimientu en 850 comunidaes, que mientres 2016 algamaron directamente a un mínimu de 31.000 neños y neñes.