Nel presente añu 2017 cúmplense 25
años de los xuegos Olímpicos de Barcelona 1992, Carreño tuvo
presente nesos xuegos que nun fueron los únicos nos que los nuesos deportistes participaron y destacaron. La hestoria del deporte nel conceyu tien un filo conductor al traviés d'estes
participaciones olímpiques, difíciles d'igualar en proporción por
otres localidaes españoles, forxaes con trabayu y xeneralmente gran
sacrificiu personal.
El iniciador, Carlos Prendes Viña
Proveniente del Club los
Gorilas de Candás, compitió con México nel piragüismu nos xuegos
olímpicos azteques de 1968, país nel que moraba ensin escaecer
nunca los sos oríxenes candasinos, asturianos y españoles. Pero
esti entamu, esta participación olímpica de Carlos, tuvo la so
continuidá nun home multidisciplinar pal deporte, aportando a
campeón d'España veteranu en delles disciplines de velocidá
n'atletismu.
Enrique Rodríguez Cal "Dacal II", héroe
deportivu en solitariu
El gran boxeador minimosca candasín
acabó con un desiertu de medayes olímpiques españoles, llogrando
un bronce en Munich 72, siendo priváu inxustamente d'un metal de
cimera categoría. Compitió n'una dómina casi prehistórica del
deporte español na qu'el nuesu paisanu marcó un finxu en tiempos
nos que faer deporte, más que una afición, yera un auténticu
sacrificiu.
Mientres munchos años foi'l mayor
referente del olimpismu español coles sos medayes en piragüismu de
Montreal 76 (plata en k4-1000) y Moscú 80 (plata en k2-500 y bronce
k2-1000), amás de campeonatos nacionales y mundiales. Darréu siguió
con una destacada carrera na xestión del deporte español dientro
del COI y na escepcional organización de los xuegos de Barcelona,
onde amás tuvo'l merecíu honor de ser el introductor de l'antorcha
olímpica nel estadiu de Montjuic p'arguyu y emoción de tolos sos
paisanos y paisanes en Candás y Carreño.
El fináu Amando Prendes representa en
Candás l'ésitu deportivu forxáu al traviés del trabayu
desinteresáu en favor del so pueblu y del deporte. Foi técnicu de
la selección nacional de piragüismu nos xuegos de Montreal 76, pero
ensin dulda la so mayor aportación foi la fundación del Club los
Gorilas de Candás xuntu a Lombardero y los sos hermanos Carlos y
Pipo (esti postreru tamién tristemente fináu), club nel qu'aplicó
les sos modernes conocencies técniques, y nel que con una xestión
prácticamente espartana apinó los palmarés individuales y por
equipos del piragüismu español con casi innumberables campeonatos
d'España, faciendo del Club los Gorilas el más galardonáu de los
clubes españoles pa sorpresa y respetu de grandes técnicos
mundiales que nun podíen esplicase unes inmeyorables resultancies
deportives con tan pocos medios, casi una heroicidá que moró nel
trabayu desinteresao y comprometío d'un escepcional entrenador que
contribuyó de forma decisiva a asitiar el nome del nuesu conceyu nel
mapa mundial. Amando recibió nel añu 2010 la medaya de bronce de la
Real Orde del Méritu Deportivu, foi nomáu fíu predilectu de
Carreño, y el centru d'actividaes náutiques del puertu de Candás
lleva'l so nome. Dexónos n'agostu del añu 2011 col pesar del so
pueblu y tol deporte español.
Ramón Menéndez Palmeiro, escepcional
deportista y meyor persona, cuenta con dos participaciones olímpiques
de piragüismu (Munich 72 y Montreal 76), gociando tamién d'un
impresionante palmarés de campeonatos nacionales ya internacionales,
difícilmente igualable nel panorama del deporte español, que fai
d'él uno de los deportistes más galardonaos de Carreño. Tres la so
retirada de la competición activa permaneció amestáu al deporte
siendo profesor d'educación física del Institutu de Candás.
Otru impresionante palmarés deportivu
con numberosos campeonatos nacionales ya internacionales, y dos
participaciones olímpiques en Barcelona 92 (piraguista en k-4,
primer muyer palista en participar nuna olimpiada) y Atlanta 96 como
seleccionadora (primer muyer seleccionadora d'una selección olímpica
de piragüismu). El dominiu de Luisa nel palmarés femenín con nada
menos que 18 campeonatos nacionales, fixeron d'ella uno de los
referentes de la muyer y el deporte n'España.
Fíu d'Amando Prendes, Carlos foi
miembru del equipu nacional de piragüismu, entrenador de la
selección española y anguaño máximu responsable de la selección
belga, onde contribuyó de forma decisiva a la so crecedera
deportiva, ensin escaecer nunca la so tierra natal.
El Varón menor de la saga deportiva de
los Prendes tamién se destacó pola so participación olímpica
n'Atlanta 96 amás de grandes clasificaciones en campeonatos
nacionales y mundiales. Anguaño mora en Baleares onde tamién
realiza llabores técnicos como entrenador nel Club Náuticu de la
localidá ibicenca de San Antonio.
Foi árbitru de piragüismu en
distintos xuegos olímpicos, ente ellos los de Barcelona 92. Como xuez deportivu participó en distintes y numberoses competiciones
nacionales ya internacionales.