El programa de senderismo pa mayores de
50 años “Caleyando Carreño” vuelve'l próximu 2 de Setiembre,
con una ruta pol conceyu de Llaviana. Esta primer travesía, d'unos
7,5 km va siguir la sienda de Ponte del Arcu hasta Tolivia. L'autocar
va salir a les 9:30 hores del Teatru Prendes, y va tornar al mesmu
llugar a les 15 hores.
Les places disponibles, van axudicase
por rigorosu orde d'inscripción, siendo esta gratuita. Les
inscripciones pa la primera de les salíes, 2 de Setiembre, van tener
llugar na Casa d'Alcuentru de les Muyeres de Carreño, del 23 al 30
d'Agostu, n'horariu de mañanes de 9 a 14 h, y de tardes de 16:30 a
19 h.
“Caleyando Carreño” naz coles
mires de siguir promoviendo l'avieyamientu activu y la prevención de
la dependencia por aciu la convivencia, el sofitu a la integración y
el fomentu de la participación. Pa consiguilo, ente les actividaes
físicu-preventives y de promoción de la salú a les yá ufiertaes
pol Conceyu, súmase'l programa de senderismo pa mayores.
Les actividaes del programa, van
dirixíes a persones de Carreño mayores de 50 años, coles
mires de facilita-yos la posibilidá de realizar paseos pedestres
empuestos, diseñaos en redolaes d'interés cultural, social o
ambiental.
Desenvolvióse una propuesta técnica
bien refecha y completa col fin de contribuyir al bienestar
psicosocial de quien participen, yá que al ser una actividá grupal
va ayudar tamién al establecimientu de relaciones interpersonales y
al refuerzu de l'autoestima. Disponse d'un técnicu con amplia
esperiencia profesional nel desenvolvimientu d'actividaes d'animación
y recreación deportiva en naturaleza y na implementación de
proyectos de senderismo con persones mayores. Dichu profesional,
dende l'añu 2006, de forma ininterrumpida, ye'l responsable del
diseñu y desenvolvimientu del programa de Senderismo nel Centru de
Persones Mayores de la Tenderina n'Uviéu; y ente los años
2007 y 2010 realizó esta mesma actividá pa la Mancomunidá Valles
del Osu dientro del Programa Rompiendo Distancies.
El programa va incluyir otres 5 rutes
más dientro y fora del conceyu, ente los meses de Setiembre, Ochobre
y Payares:
Ruta de Moal- Reserva de Muniellos (23
de Setiembre)
Los Llagos de Cuadonga (7 d'Ochobre)
Fayedal de Montegrande – Cascada del
Xiblu (21 d'Ochobre)
Cabu Vidio (4 de noviembre)
Ilesia de Llorgozana- Alto Albandi (18
de Payares)
Estos percorríos previstos podríen
cambiase si se van detectaren anomalíes na reconocencia previa de
les mesmes, lo que se comunicaría na mayor brevedá posible a les
persones que participen y propondríase-yos un percorríu
alternativu.
Les persones comenenciudes tienen de
ponese en contactu cola Axente d'Igualdá na Casa d'Alcuentru de les
Muyeres de Carreño -Plaza Gremio de Mareantes, 2, baxu. Candás Tlf: 985872029 Email: igualdad@ayto-carreno.es.