II Concursu d'Arrastre de Gües n'El Pieloro

Sumándose al Concursu de Ganáu y restu de celebraciones na parroquia d'El Pieloro, tuvo llugar esti sábadu 19 d'agostu, a les 19 hores, el II Concursu d'Arrastre de Gües. 7  pareyes de gües asturianos  propiedá de Elisa Isolina Menéndez, Rosa Ana Fernández, Marta Vega, Abel Fernández, Manuel Fernández, Luis Carreño, y María Jesús Rodríguez esibiéronse nel espectacular arrastre, siguíu por numberosu públicu. Trátase d'una cifra de participación bien alta, en comparanza con otres competiciones asturianes.


L'orde d'arrastre (realizáu mientres 8 minutos) foi'l que sigue:

El carreteru Isaac López de Villavaler en Pravia colos gües Brillante y Castillo. Tiró de 800 kg. empezando con muncha brenga, pero-y rompió'l xugo y tuvo qu'abandonar.

Darréu empunxo Juan Fernández de Sograndio n'Uviéu colos gües Rubio y Navarro. Tiró por mil trescientos quilos más el pesu del rastru (170/180 Kg). Dieron cuatro vueltes y media.

De terceres, empunxo Luis Carreño "'Luisito" de Pillarno (Castrillón) colos gües Navarro y Marín. Tiraron bien apareyaos ensin parar nos 8 minutos, quedaron a pocos metros de l'anterior pareya.

Germán Albuerne de Santa Marina (Cuideiru) foi'l carreteru que participó en cuartu llugar con Artilleroy Gallardo. Dieron casi cinco vueltes.

Giovanni Fernández, de Les Caldes (Uviéu), fizo l'arrastre con Piquero y Alegre. Ye un mozu carreteru que participa n'arrastres asiduamente n'Asturies, País Vascu y Cantabria. Dió seis vueltes y cuartu, foi'l vencedor del concursu.

Manuel Fernández de Ferroñes conceyu de  Llanera, con Mimbre y Rubio, dio cinco vueltes y un cuartu.

José  Manuel Vega de Gozón, colos gües Romero y Rey, consiguió dos vueltes y casi trés cuartos.

Los festexos van siguir hasta mañana llunes 21, con actividaes diverses, música y fueos artificiales como remate.