La nueva directiva de l'asociación vecinal L'Ablanal caltuvo una entrevista cola Alcaldesa y el conceyal de mediu rural, Manuel Noceda. La entidá vecinal que preside Enrique García Álvarez, tres l'apocayá renovación de la xunta directiva, treslladó na mañana de güei al gobiernu local les necesidaes de meyores que precisa'l barriu candasín. La xunta na que tamién participó'l Secretariu de l'asociación, Martin Muñiz Artime.

L'arreglu y enanche de la carretera autonómica CE-1, unos pidimientos de meyores nos caminos, el reclamar a la Confederación la llimpieza y adecuación del calce del ríu del Regueral, el desenvolvimientu d'actividaes culturales, según revisar los estaos de caltenimientu de delles instalaciones y proyectos a executar na zona, fueron los asuntos trataos nel alcuentru celebráu.

“Nuevamente vamos solicitar, dende'l Conceyu, a la Confederación Hidrográfica del Cantábricu, organismu que tien les competencies de llimpieza de los calces fluviales y depende del Ministeriu d'Agricultura y pesca, alimentación y medioambiente, que cumpla colo solicitao. En tol conceyu de Carreño los ríos presenten una situación de caltenimientu deficitariu,  Yynel casu d'esti barriu de Candás el puntu más conflictivu ta como señala la entidá vecinal nos 300 metros anteriores a l'antigua escuela con anegaciones qu'afecten al vecinderu y les sos viviendes en periodu d'agües. Vamos Aportunar a la Confederación nuevamente na necesidá de caltener el bon estáu ecolóxicu de los ríos en Carreño, especialmente nes zones con viviendes. Ye necesariu que'l Gobiernu d'España invierta pa caltenelos, lo que va contribuyir igualmente a evitar que cuando llueva con intensidá, prevénganse hinchentes. Confiamos cuntar col sofitu del PP de Carreño, de que'l so partíu dependen los esfuerzos inversores que se faigan dende la Confederación en Carreño, y el restu de fuerces polítiques con representación municipal por que se atiendan les necesidaes y llimpieza de los calces fluviales carreñenses. N'otres comunidaes autónomes como Galicia y Estremadura les confederaciones realizaron actuaciones nos ríos en collaboración colos Conceyos” – esplicó l'Alcaldesa.

“Compartimos dafechu'l sentir vecinal d'impulsar una meyora de los accesos al Regueral barriu de Candás, con un usu residencial creciente, y con una infraestructura obsoleta dáu la crecedera esperimentada na zona. Na xunta caltenida apocayá  col Conseyeru  d'Infraestructures Ordenación del territoriu y Mediu Ambiente, Fernando Lastra, yá interesamos poles meyores de los viales autonómicos en Carreño. Confirmónos que n'ochobre van axudicar la pavimentación de la carretera CE-7 nel barriu de Villar de Tamón a la que van destinar 314.844 euros y comprometióse a visitar antes de final d'añu'l conceyu pa priorizar les inversiones nes carreteres nos próximos años. Hasta la visita del Conseyeru vamos trabayar coldu a coldu cola asociación vecinal d'El Regueral parar peracabar la concreción de les meyores que precisa'l vial rexonal pa una mayor comodidá de viandantes, ciclistes y una mayor seguridá” – añedió la rexidora.

La directiva vecinal tamién s'interesó pola situación na que s'atopa'l proyectu de ADIF que contempla la pretendida eliminación de los pasos a nivel na zona. 

Asina mesmu, el trescursu de la xunta l'Alcaldesa informó-yos de les meyores na rede d'agües que se van realizar de suministru na zona de la Teyera per parte del Principáu y del interés del gobiernu local de que parte del remanente que se ta axustando col restu de grupos políticos destínense fondos p'actuaciones de meyora de la rede de suministru d'agua na zona y de la redolada del manantial.

A lo último, en cuánto a les reivindicaciones de la entidá en materia de cultural, la rexidora confirmó-yos que na próxima programación d'Estensión Cultural 2017/2018  la Conceyalía de Cultura va impulsar una acción formativa nes escueles d'El Regueral. La temática del cursu va faese conforme a les prioridaes qu'afite'l vecinderu de la localidá.