“La señal que se recibe de
televisión en Candás, dende va meses, ye bien mala. El
repetidor que tresmite la señal na villa pertenez a Cellnex Telecom
(antigua RETEVISIÓN) y ta asitiáu nel monte Fuxa dientro d'una
propiedá privada, que'l so propietariu torga l'accesu a la zona del
repetidor, colo que l'operador nun pudo realizar los llabores de
caltenimientu y llimpieza necesaries por que, siquier la señal,
tresmitiérese nes meyores condiciones técniques posibles. Los
servicios públicos (que tienen qu'ufiertar al vecinderu'l prestador
del serviciu d'espardimientu de la señal de televisión) deberíen
de ser de calidá y tán bien llueñe de selo nestos últimos
meses”- afirmó Gabriel Rodríguez, voceru del gobiernu y edil
d'innovación.
Esta situación provoca innumberables
quexes vecinales, tamién de sectores como'l de la hostelería, de
técnicos locales y del propiu Consistoriu.
“Llevamos meses asina, señaló'l
Conceyal denunciando públicamente la falta de calidá de señal de
televisión dixital en Candás, lo que fai que'l vecinderu nun pueda
ver mínimamente les imaxes nos sos receptores. Y dada la orografía
de Candás nun hai munches opciones de buscar otros allugamientos,
alternativos al actual, que pudieren ser afechos pa distribuyir la
señal con calidá"- señaló Rodríguez.
“Les instalaciones del Monte Fuxa
nun tán funcionando correutamente debíu a la crecedera del arboláu
y vexetación na so redolada. La cuestión tendría una bona
solución: l'operador qu'empresta'l serviciu, por concesión del
Ministeriu, Cellnex Telecom, tendría que realizar unes simples xeres
de fradadura y llimpieza. Sicasí, diches xeres nun pueden ser
realizaes por al esistir un conflictu cola propiedá del terrén
sobro'l que s'asientan les instalaciones y torgar que l'operador
apuerte a realizales” –esplicó'l conceyal.
“Dende'l Conceyu, en cuántu
tuvimos conocencia de primeres dificultaes vecinales pa ver la
televisión, punximos manes a la obra. Y en tou momentu trabayemos pa
entemediar nel resolvimientu d'esti conflictu ente l'operador y el
propietariu de la finca, calteniendo xuntes diverses y faciendo
xestiones coles dos partes. La primer cita producióse'l pasáu 11
d'Abril nel Ayuntamientu de Carreño. Tenemos constancia que
l'operador yá formuló, a finales de Xunetu, una propuesta acordies
con aportación económica a la propiedá, qu'entá ta siendo
estudiada polos servicios xurídicos del dueñu de la finca, ensin
qu'hasta la fecha pronunciárense”- prosiguió'l conceyal.
.
El Conceyu de Carreño nun tien
competencies sobro la materia de telecomunicaciones y, por tanto,
escarez de capacidá alministrativa p'arreglar la situación. A pesar
d'esta llimitación de competencies y na defensa de los intereses
vecinales nun remacariemos esfuerzos en treslladar les quexes
vecinales a les alministraciones responsables y tratar de favorecer
alcuerdos ente les partes, convocando xuntes p'algamar los alcuerdos
necesarios (operador – propietariu) que dexen que la
señal de televisión emítase correutamente.
El gobiernu local yá contactó con
responsables del Serviciu de Telecomunicaciones del Principáu y col
Ministeriu d'Enerxía, Turismu y Axenda Dixital, alministraciones con
competencia nesta materia, con cuenta de de una vegada tomen les
midíes oportunes p'ameyorar la calidá de la recepción de
televisión na villa capital del conceyu carreñense.
“A estes xestiones coles
alministraciones responsables, hai que sumar, que dende'l primer
momentu intentemos entemediar ente operador y propietariu con cuenta
d'algamaren un alcuerdu. A pesar de los numberosos contactos y xuntes
coles partes, enagora, entá nun foi posible'l resolvimientu del
problema. Ye más, día ente día vase agravando, causando
importantes problemes al vecinderu”.- añedió Rodríguez.
El Conceyu buscó, en tou momentu, que
les dos partes implicaes algamen alcuerdos y va entamar cuántes
acciones que tán na so mano pa sofitar al vecinderu de Candás
cuidao que Cellnex Telecom ta obligada a emprestar el serviciu
públicu en condiciones fayadices.
“Vamos sofitar técnica y
jurídicamente al vecinderu, asociaciones y comunidaes de
propietarios poniendo a la so disposición l'asesoramientu necesariu
por que puedan formular les sos denuncies y tramitales
telemáticamente dende Candás” – avanzó'l conceyal.
“A tal fin, a partir d'el próximu
llunes, tres el periodu de fiestes patronales, la Oficina Municipal
d'Atención Ciudadana, sita na planta baxa de la Casa Consistorial,
va facilitar la información necesaria pa formular les denuncies
correspondientes énte les Alministraciones que tienen la
competencia- Vamos Tramitar les mesmes de forma telemática y
gratuita, evitando, d'esta miente, gastos y más molesties de
les esistentes al vecinderu, cuidao que les entidaes competentes
atópense fora de Carreño” – señaló Gabriel.
“Amás, complementariamente tamos
ellaborando toa una serie de documentación técnica y xurídica que
constate la situación de mala o nula cobertoria que venimos
sufriendo en Candás pa denunciar, como Alministración local, los
fechos énte la Oficina de TDT del Ministeriu d'Enerxía, Turismu y
Axenda Dixital, la Comisión Nacional de los Mercaos y la
Competencia (CNMC) y la Dirección Xeneral d'Industria y
Telecomunicaciones del Principáu d'Asturies”- repostió'l
conceyal.
“El Conceyu va siguir encamentando
a les partes por que lleguen a un alcuerdu inmediatu, ensin refugar,
de nun resolvese'l problema, nenguna otra vía que pueda faelo”,
concluyó Rodríguez.