Gracies a la implantación d'un serviciu de comunicación, al traviés d'una aplicación pa móviles que se denomina “Línea Verde” el vecinderu de Carreño dispon d'un canal directu de comunicación col Conceyu. Línea Verde ye la ferramienta, cola que yá trabayen más de 300 conceyos en toa España y qu'inclúi una serie de servicios p'ameyorar la xestión municipal, el resolvimientu d'incidencies na vía pública y fomentar la comunicación cola ciudadanía, ente otres utilidaes.

Sirve por que'l vecinderu informe sobre los desperfectos alcontraos nel conceyu, favorez l'usu de les “bones práctiques” medioambientales y en consecuencia dexa avanzar nel desenvolvimientu d'un conceyu sostenible.

El serviciu Línea Verde anicióse en Carreño nel añu 2013 y dende entós tuvo una bien bona acoyida, prueba d'ello, ye l'usu continuu que se fai del mesmu.

“En Carreño, el tipu d'incidencies que más nos comunicaron por esta aplicación pa móviles, no que va d'añu, son aquélles que faen referencia a “Allumáu”, siguíu de “Ceres y Calzaes”, “Basures”  y “Parques y Xardinos”. A día de güei, el 96% de les incidencies comunicaes fueron yá tramitaes polos servicios correspondientes” – espresó'l conceyal de medioambiente, Gabriel Rodríguez.

Pa poder utilizar esti serviciu de comunicación dixital ye necesariu dar na descarga de la APP Línea Verde nel móvil. Pa ello,  hai qu'aportar a  Google Play o APP Store en función de la tecnoloxía emplegada nel so Smartphone (Android/iOS).  Una vegada alcontrada, llévase a cabu la descarga de forma gratuita. A partir d'esi momentu, la persona escueye'l conceyu sobro'l que quier comunicar la incidencia. El procedimientu ye bien rápido y  senciellu. Amás, en casu de tener dificultaes pa instalala o remanala nel CDTL “C@rreño Digit@l” empresta formación nel so usu y ayuda na instalación.

Pa comunicar una incidencia, basta con pinchar sobre'l botón “Notifica tu incidencia”. Nun primer desplegable solicítase nome, email y teléfonu, de siguío, apaez en pantalla otru desplegable coles distintes tipoloxíes d'incidencies. Asina cada persona escueye aquélla sobre la que quier comunicar al Conceyu. De forma automática, la APP detecta les coordenaes esactes nes que s'alluga'l desperfecto. El siguiente pasu ye axuntar una semeya de la incidencia y observación sobro la mesma. Yá namá queda dar al botón d'unviar. Una vegada unviada, personal del Conceyu recibe notificación del desperfecto comunicáu. A partir d'esti momentu, empecípiense los trámites pa dar solución a la incidencia detectada. De la mesma, el vecinderu que echa voz de la incidencia recibe notificación nel so teléfonu móvil siempres que se produza un cambéu nel estáu de la mesma, esto ye, téase solucionando o tramitando.

“Al traviés de Línea Verde, puede plantegase cualquier consulta medioambiental. Basta con escoyer la opción de “Haz tu consulta”. Nun plazu máximu de 24 hores va tener respuesta per parte d'un equipu de persones espertes na materia de forma dafechu gratuita” – prosiguió'l conceyal.

Al serviciu Línea Verde tamién puede aportase al traviés de la web www.lineaverdecarreno.com. Amás de comunicar una incidencia o plantegar una consulta,  aporta un ampliu conteníu de consulta medioambiental (guía de bones práctiques, conseyos, información propia del conceyu etc…).

Línea Verde tamién ufierta los sos servicios al traviés de contactu telefónicu nel númberu 902193768 n'horariu de 9 a 18 hores (costu de la llamada 0,07 €/min).

 “Desque enllantamos Llínea Verde hai una comunicación más directa. Cuando daquién detecta dalgún desperfecto, yá mesmu, puede comunicar directamente ensin pasar por un ventanu o rexistru. D'esta miente, gracies a la collaboración ciudadana'l tiempu de resolvimientu d'incidencies va menguando progresivamente. Detéctense antes los problemes al llegar más rápidu los avisos d'incidencies y pollo, dende los servicios municipales podemos encetalos  lo más llueu”  - afirmó Rodríguez.

“Los Conceyos tenemos qu'afaenos a los tiempos nos que vivimos. D'ende'l nuesu apueste por modernizar la comunicación col vecinderu, recíbense más incidencies diariamente por esta aplicación de móvil, pola facilidá d'usu, que pel teléfonu del serviciu d'obres o'l rexistru municipal. A naide escápase-y que les tecnoloxíes tán a la orde del día, la mayoría de les persones llevamos un teléfonu móvil siempres con nós, si queremos treslladar dalgún desperfecto que se ve o una necesidá d'arreglu con esta aplicación ye casi inmediata la posibilidá de comunicanos lo. Ye sacar el móvil, faer una semeya y mandala. Muncho más senciellu y rápido” -  concluyó'l conceyal.