La Conseyería d'Infraestructures, Ordenación del Territoriu y Mediu Ambiente va axudicar n'ochobre les obres de renovación de pavimentu de la carretera de Villar de Baxo y Villar de Riba, na parroquia de Tamón. Los trabayos tan presupuestaos en 314.844 euros pa un total de 5,1 kilómetros y un plazu d'execución de siete meses.

El conseyeru Fernando Lastra, comunicó esta selmana los planes del so departamentu a l'Alcaldesa de Carreño, Amelia Fernández, mientres la celebración d´una xunta pa tratar diversos asuntos d'interés pal conceyu rellacionaos con carreteres, puertos ya infraestructures hidráuliques de saneamientu y depuración.

La Dirección Xeneral d'Infraestructures y Tresportes tamién va empezar esti mes les obres d'urbanización del puertu de Candás, una vegada remataos los diversos actos programaos pal branu. Nel plazu de trés meses, va pavimentase una superficie de 6.537 metros cuadraos onde se van habilitar 193 places d'aparcamientu pa vehículos y 28 más pa motocicletes. Los trabayos axudicáronse en 125.083 euros a la empresa Alvargonzález Contratas.

Coles mesmes, Lastra treslladó a l'Alcaldesa que nesti exerciciu va aprobase y llicitase un proyectu de meyora de la rede d'agua nel conceyu, con un presupuestu de 270.593 euros,,que va incluyir cuatro actuaciones; la renovación de La Parada-Candás y completar tanto la rede como les conexones en Cabovilla (Llorgozana), El Fondu (Quimarán) y El Regueral.