La comisión de pesca d'ADICAP
aconceyada en Candás propunxo a la Dirección Xeneral de
Pesca Marítima l'aprobación de cinco ayudes por cuenta de la
convocatoria 2017 del Fondu Européu Marítimu y de Pesca 2014-2020
publicada nel BOPA nel mes de xunetu y con una dotación
presupuestaria de 175.000 € pa empreses privaes, 60.000 € pa
entidaes locales y 31.520,60 € pa entidaes ensin ánimu
d'arriquecimientu.
Les ayudes a aprobaes correspóndense a
un proyectu empresarial entamáu por un pescador del conceyu pa la
puesta en marcha de siete apartamentos turísticos en Candás y que
recibió una subvención de 147.598,38 €, (62.598,38 € con cargu
al añu 2017 y @5.000 € con cargu al añu 2018).
Na llínea d'ayudes destinaes a
entidaes locales aprobáronse trés proyectos, dos d'elles al Conceyu
de Carreño pal proyectu “I Festival de la Mar: Enrédate en
Candás” que se va celebrar dende'l 12 al 15 d'ochobre na antigua
fábrica d'Ortiz y nel puertu pesqueru con una ayuda de 17.545 € y
pal proyectu de realización d'una escultura en bronce que va sirvir
d'homenaxe a les muyeres rederes y que va formar parte d'un
itinerariu cultural relativu a la cultura marinera y pescadora en
distintos barrios de Candás, esti proyectu recibió una ayuda de
22.082,50 €. El tercer proyectu aprobáu ye un proyectu del Conceyu
de Gozón pa la instalación d'una grúa nel puertu de Bañugues con
una ayuda de 372,50 € al ser el creitu que quedó disponible una
vegada establecida la prelación ente les solicitúes.
A lo último, na llínea d'ayudes
destinaes a entidaes ensin ánimu d'arriquecimientu a la Fundación
del Muséu Marítimu d'Asturies concedióse-y una ayuda de 31.414,94
€ (21.520 € con cargu al 2017 y 9.894,34 € con cargu al 2018)
pa la conversión del salón d'actos y la sala central espositiva del
muséu en sala d'inmersión de realidá virtual y proyección
audiovisual con equipamientos en últimes tecnoloxíes audiovisuales.
Toles ayudes tán cofinanciaes pola
Unión Europea nun 85% y pol Principáu d'Asturies nun 15%.
D'esquierda a derecha na
semeya, Silvia Escandón representante de AMPPA (Asociación de
Mayoristas de Pexe del Principáu d'Asturies), María Rosario Pradina
del movimientu asociativu de Gozón, Fernando Manuel García, xerente
de Adicap, Amelia Fernández, Presidenta de la Comisión y Alcaldesa
de Carreño y María Jesús Rodríguez de la Cámara de Comerciu
d'Avilés.