Esti Martes día 10 d'Ochobre a les 19 h., nel marcu III alcuentros d'arqueoloxía, hestoria y patrimoniu de l'Alfoz de Gauzón (entidá que englobaba a los conceyos d'Avilés, Castrillón, Corvera, Illas, Gozón y Carreño) va celebrase en Candás la Conferencia  “Los primeros horros conservaos nel Alfoz de Gauzón y especulación sobre el orixen de la so estructura” a cargu del historiador carreñense Julio César Zapico

La cita ta entamada pol Conceyu de Carreño, Club Popular Cultura de Llaranes (Avilés), l'Asociación de profesionales asturianos d'arqueoloxía (Apiaa) y l'Asociación d'amigos del horru asturianu.

L'historiador especialista n'horros Julio César Zapico va impartir una charra p'analizar les peculiaridaes de les paneres y horros de Carreño concretamente les allugaes en Coyanca (Perlora), El Pedregal, Llantero ( dambos barrios de Llorgozana) y El Redal, perteneciente a la parroquia de Tamón

“Amás de les conferencies y acciones divulgatives sobro los horros el gobiernu local pretende impulsar el meyor caltenimientu d'aquellos exemplares d'Estilu Carreño y mayor antigüedá. A tal fin, nel presupuestu municipal de 2017 habilitóse una partida presupuestaria de 15.000 € pa una nueva convocatoria de subvenciones. L'oxetu d'esta nueva llínea de subvenciones municipales ye a concesión d'ayudes a les distintes persones físiques qu'ostenten la condición de propietarios/es d'horros o paneres, yá sía de forma individual o compartida, allugaos dientro del conceyu de Carreño, y al envís de llevar a cabu obres de caltenimientu o reforma estructural, caltenimientu de cubiertes o recuperación de les sos característiques orixinales “ – esplicó Cecilia Tascón, conceyala de Cultura.

“Hasta'l momentu, recibimos nel rexistru municipal cuatro pidimientos d'ayuda pa caltener/restaurar horros. Dos de les solicitúes son del barriu d'El Fonduo na parroquia de Quimarán, otra del barriu de la Torre en Perlora y una de Candás del barriu del Piñeo. El plazu pa solicitar estes ayudes municipales conclúi'l próximu 16 d'Ochobre” – señaló Tascón.

La execución de les obres subvencionables va riquir sía que non la previa concesión de la correspondiente llicencia municipal d'obres y de la Dirección Xeneral de Patrimoniu, si fuera precisu, y que les actuaciones previstes sían conformes colo establecío nel Plan Xeneral d'Ordenación y Catálogu Urbanísticu de Carreño. 

Les ayudes que se concedan van tener calter de subvención, polo que se van rexir, amás de polo previsto nestes bases, pola Llei 38/2003, de 17 de noviembre, Xeneral de subvenciones, pol Reglamentu que desenvuelve dicha Llei d'aprobáu por Real decretu 887/2006, de 21 de xunetu, pola ordenanza Xeneral de subvenciones del Conceyu de Carreño anguaño a valir y la restante normativa que-yos sía d'aplicación.

L'esfrute d'estes subvenciones va ser compatible con otres de naturaleza pública (exemplu les convocaes anguaño pol Gobiernu del Principáu) o privada otorgaes al beneficiariu/a pal mesmu fin, y siempres que l'importe total de les ayudes nun entepase del 100% del presupuestu protexible. Considérase presupuestu protexible, al oxetu del cálculu de la subvención a otorgar, el presupuestu d'execución material de les obres subvencionables. Van Poder incluyise ente los gastos subvencionables los honorarios del proyectu  o informe técnicu, según el visáu del Colexu Profesional y la Dirección d'obres. En nengún casu va ser subvencionable el IVA. Nel casu de que namá se solicite ayuda pa l'alquisición de los materiales, el presupuestu protexible va coincidir col preciu de los mesmos, escluyíu'l IVA.  El presupuestu protexible presentáu va ser oxetu d'exame polos técnicos municipales pa escluyir del mesmu aquelles partíes que nun se correspuendan puramente con obres de caltenimientu o reforma estructural, caltenimientu de cubiertes o recuperación de les sos característiques orixinales, y nesti casu, el presupuestu protexible al oxetu del cálculu de la subvención a otorgar va ser el que resulte de los axustes efectuaos polos técnicos municipales.

La concesión d'estes subvenciones va efectuase por aciu un réxime de concurrencia competitiva. La cuantía máxima por solicitú de subvención a conceder va ser del 60 % del presupuestu. Nun se van conceder subvenciones a los horros o paneres que nun caltengan les sos característiques constructives y fisonomía tradicional sacantes l'ayuda económica se solicitase al Conceyu precisamente pa recuperar tales condiciones.