El Conceyu de Carreño dispon d'una parcela de titularidá municipal nel Barriu de la Matiella en Candás na cual diseñáronse 56 güertos que tienen una superficie ente 35 y 50 m2. Dada la orografía del terrén los güertos dispónense en bancales, lo que va facilitar los llabores de trabayu y movilidá, con una diferencia máxima d'altor ente ellos de 55 cm. Esti escalonamientu resolvióse al traviés d'unes chapes metáliques fincaes nel terrén. 

Cola creación d'esti espaciu preténdese:

-Fomentu de la participación ciudadana y del desenvolvimientu sostenible.

-Promover la Educación Ambiental.

-Establecer y valorar les relaciones ente'l mediu natural y les actividaes humanes.

-Facilitar el contactu directu y la manipulación d'elementos como la tierra, l'agua, les plantes, etc., apurriendo una esperiencia enriquecedora.

-Conocer les técniques de cultivu de l'Agricultura Ecolóxica.

-Fomentar l'alquisición d'una serie de valores que nos motiven a sentir interés y esmolición por caltener la biodiversidá y los hábitats naturales de les especies hortícolas tradicionales y autóctones.

-Ufiertar al colectivu de persones mayores una actividá lúdicu-educativa, na que partiendo de la so posible esperiencia, ayuden a otres persones nes llabores propios de l'actividá d'agricultura urbana y periurbana.

Nel plenu del mes de Febreru'l Consistoriu xuntóse al Pactu de Milán, relativu a la Politica alimentaria urbana, que contempla ente otres acciones l'impulsu de les alministraciones locales a proyectos de güertos comuñales. 

“Xuntamos a esti Pactu considerando que l'agricultura urbana y la periurbana ufierten distintes oportunidaes pal caltenimientu ya integración de la biodiversidá nel contestu urbanu/rexonal y nos sistemes alimentarios, contribuyendo asina a la creación de sinerxes ente seguridá alimentaria y nutricional, y los servicios rellacionaos a los ecosistemes y el bienestar humano” – afirmó'l conceyal  Manuel Noceda.

Y nel marcu del alcuerdu presupuestariu d'esta añalidá, los grupos políticos PSOE y SOMOS Carreño, alcordaron destinar 17.000 € del presupuestu municipal pa dir avanzando nel equipamientu de los güertos.  D'esta miente, presupuestóse la construcción d'un edificiu común que sirva p'almacén de los preseos de los futuros usuarios y usuaries de los güertos allugaos na parcela municipal.

Na execución de la obra de los güertos yá se construyó una solera de 10,30 metros de llongura por 4,60 metros d'anchu pal futuru allugamientu d'esta caseta de preseos. 

La solera cuenta con trés arquetes de saneamientu conectaes a una arqueta séptica que dexaríen la instalación d'unos aseos en casu de ser necesarios. Tamién tien una arqueta d'acometida pa suministru d'agua.

“L'edificiu d'almacén va executase na solera esistente. Va Tener planta rectangular d'un únicu altor y va rematase por aciu una cubierta a dos agües de texa curva. La superficie construyida del nuevu edificiu va ser de 47,38 m2 que nun va tener nenguna división interior. Prevense, sicasí, dos puertes dobles al interior del mesmu pa facilitar una futura división interior, si se precisara” – señaló Manuel Noceda.

Los accesos proyecténse na fachada norte que s'atopa en contactu cola zona d'aparcamientu. Na fachada sur van dexase dos buecos de llume con carpintería d'aluminiu que dexe xuna correcta ventilación del interior.

La estructura de cubierta va executase por aciu cerches y correes metáliques. N'esta estructura asitiaráse un panel sándwich metálicu. Les fachaes van executase de bloque de formigón cargáu exteriormente. va asitiase un zócalo de piedra de 1 metro d'altor. El restu de la fachada va pintase con pintura d'esteriores.

“Tres el correspondiente procesu de llicitación les obres d'execución de la caseta de preseos axudicóse a la empresa Anselmo Bango Obres y Contrates S. L. por importe de 12.986 € “ – esplicó'l conceyal.

“Y de equí a final d'añu, vamos siguir trabayando na concreción del Reglamentu de los mesmos y de la Ordenanza. Partimos d'un borrador de reglamentu que s'ellaboró la llexislatura pasada participando na so definición persones del conceyu qu'espresaren el so interés n'utilizalos.  Tamién tenemos que definir una tarifa nueva, dientro de les tases municipales vixentes, que regule'l pagu del consumu de l'agua que faigan y que'l so costu distribúyase ente les persones axudicataries de los mesmos. Cada axudicatariu va poder faer na so parcela la so propia caseta de preseos, a mayores de la común que vamos construyir, por que pueda facer pola so cuenta  tendrá d'afaese a unos requerimientos técnicos del Conceyu por qu'esista uniformidá n'elles” – añedió Noceda.

“Los 10 módulos de compostaxe, 10 pequeños invernaderos, guarda contenedores y otru moblame va dase n'asitiar una vegada apruébese'l reglamentu. Y d'últimes nel mes de Xineru vamos ufiertar una formación n'Agricultura Ecolóxica pa toles persones comenenciudes” – concluyó'l conceyal.