La Ilesia de San Pedro Advíncula acoyó un alcuentru Coral nel qu'intervinieron les corales polifóniques de Liérganes y la de Candás. El conciertu tuvo presidíu pol rexidor cantábro Santiago Rego y l'Alcaldesa de Carreño, Amelia Fernández.

La Coral Polifónica de Liérganes que se constituyó en 1997 por un grupu d'amigos y amigues cola única idea de crear una agrupación coral pa prestase cantando foi la primera n'intervenir. Ta integrada por 30 voces mistes y el so repertoriu toma habaneres, polifonía, música rexonal y popular, godspell, etc. El so director, que ye'l fundador y principal impulsor de la mesma, Valeriano Labrador Ruiz, realizó los sos estudios musicales nel Conservatoriu “Jesús de Monasterio” de Santander, onde cursó harmonía, cantar coral y contrapuntu. Amás realizó numberosos cursos de dirección coral con Manuel Cavero, Enrique Azurza, Carlos Gorricho, Juan Mª Esteban (técnica Celibidache) y Esteban Sanz (Director del Coru Llíricu del Palaciu de Festivales de Cantabria). Dirixió distintes corales y, na actualidá compaxina'l so trabayu de profesor de primaria na especialidá de música cola dirección d'esta Coral. La Coral cántabra remató la so intervención interpretando l'Himnu de Cantabria, énte'l vecinderu y públicu visitante que s'averó hasta esta localidá. Nel próximu mes de Setiembre, nel marcu de la festividá del Cristu, van participar en Candás el Conciertu Coral post pregón de fiestes.

La Coral Polifónica “ Aires de Candás” foi fundada en 1980. Integrénla 30 voces mistes, y forma parte de la Federación Coral Asturiana. El so repertoriu consta de polifonía clásica, relixosa y profana de los sieglos XVI al XX, según tamién d'habaneres y temes populares y polifóniques d'Asturies y otres rexones. Ufiertó conciertos per tol Principáu d'Asturies y na mayoría de les Comunidaes españoles: Valencia, Andalucia, Estremadura, Navarra, Galicia, Castiella-Llión... Tamién actuó en diversos países: Francia, Austria, Suiza, Portugal… Realiza dacuando intercambios con corales d'otres Comunidaes y d'Asturies. Participó en dellos certames corales llogrando premios en: Avilés, San Vicente de la Barquera, Noia, La Felguera, Uviéu...Participó na ellaboración d'un CD p'ambientación del Muséu de la Sidra y grabáu n'una casete con temes populares y navidiegos. Tamién participaron na escenificación del musical “José” basada na novela d'Armando Palacio Valdés y na representación de la zarzuela “El Rapacín de Candás”. Aires de Candás entama, dende 2002, xuntu col Centru Cultural Teatro Priendes una amuesa de cantar marineru y habanera nel marcu de la festividá del Cristu. El próximu añu van cuntar cola coral cántabra. El so Director, dende 2001, ye Marco Antonio García de la Paz y tienen la inestimable collaboración, nel aspeutu vocal y d'educación musical, d'Elena Rosso Valiña profesora de la Escuela de Música “Miguel Barrosa” de Carreño.

La coral candasina interpretó en Cantabria los cantares que siguen:

EXULTATE JUSTI

SEÑOR, ME CANSA LA VIDA

CANTOS DEL FUEGO I y II

MAITIA  NUN  ZIRA

FLORES DE AMOR

EXTIENDE LA RED

AL COMPÁS DE UNA HABANERA

CON SABOR TROPICAL

“Que Candás ye la mar de sonora ye daqué incuestionable. Ello, débese, en bona parte, al llabor educativu que se vien impulsando dende va años. D'esta miente, güei esfrutamos d'una calidá escelente de coros y agrupaciones corales. Colectivos que son embaxadores de la so tierra y que cada añu lleven la nuesa música y cultura como estandarte fora de les nueses fronteres. Esta fin de selmana, la Coral Polifónica “Aires de Candás” sonó la mar de bien en  que nesti marcu incomparable como Liérganes que lo tipifican como una xoya y unu de los pueblos más guapos d'España y del mundu. Tal ye asina que al términu del so últimu cantar “Con Sabor Tropical” el públicu púnxose de pies p'aclamar a la coral candasina” – señaló Amelia Fernández, Alcadesa de Carreño.

Al remate del conciertu coral Santiago Rego agasayó a l'Alcaldesa de Carreño con unes publicaciones de la zona. Material bibliográfico que la rexidora va donar a la Biblioteca Municipal pa usu y consulta del vecinderu del conceyu. Amelia Fernández, pela so parte, gasayó al rexidor de Liérganes con una pieza cerámica que reproduz una panera estilu Carreño, obra de la ceramista Rita Prendes, y un exemplar d'una  re-edición llindada de la Hestoria de Carreño” obra del cronista tristemente fináu, Marino Busto García.