Esta selmana empezó, na zona rural de Carreño, la segunda fase de la campaña añal de roces. Los trabayos de roza y llimpieza de turries, terrenes, marxes y cunetes axudicaos el pasáu mes de Mayu, tres un procesu de llicitación nel que participaron 7 empreses, axudicáronse a AGROFORESTAL GRADO S.L.U.

“Al llabor que realiza'l tractor municipal, sumóse, con esta contratación, el refuerzu del trabayu d'un tractor con brazu articuláu y cabezal rotor de cuchielles. El conductor y cuatro operarios ( 2 trabayen  con rozadora manual; 1 fai llabores de sopláu y  1 señalista), amás d'un touterrén con remolque pa treslladar materiales y borrafes. Van Actuar en 116 kilómetros llineales de caminos y carreteres municipales. Al dir llimpiando en dambos marxes suponen, en realidá, un llargor real de 232 kilómetros” – esplicó Manuel Noceda, edil de Mediu Rural.

Los trabayos que van realizar, cola supervisión del Inxenieru Técnicu Agrónomu de la Mancomunidá Cabo Peñes, consisten en:

-Roza de marxes de caminos y turries.

-Roza y llimpieza de terrenes municipales

-Llimpieza de cunetes y obres de fábrica.

Les zones a rozar programáronse siguiendo l'orde realizáu nel primer corte: 

-Parroquia de LLorgozana: 1 selmana de duración envalorada de los trabayos.

-Parroquia d'El Valle: 1 selmana de duración envalorada de los trabayos.

-Parroquia d'Ambás: 1 selmana de duración envalorada de los trabayos.

-Parroquia de Tamón: 1 selmana de duración envalorada de los trabayos. 

-Parroquia de Quimarán: 1 selmana de duración envalorada de los trabayos.

Esti cronograma de llimpieces entámase en función del calendariu festivu de les parroquies. El restu de parroquies rozaránse con medios propios municipales. Dende'l gobiernu municipal recuérdase qu'ésta ye una de les xeres más aballadores que realiza l'executivu, sobremanera teniendo en cuenta la estensión de la rede viaria. La finalización de los trabayos ta prevista pal día 29 d'avientu de 2017.

“Non yá rózase en temporada braniza. Sinón que faemos dos curties al añu. Toes estes actuaciones de llimpieza y roces, como vien siendo habitual nel conceyu, tienen como oxetivu torgar percances en llugares nos qu'a partir del mes de setiembre, cola llegada d'eventuales agües enchentes puedan causase daños en viviendes de les zones rurales o na rede viaria” – concluyó'l conceyal.