Dende l'añu 2014 el Conceyu de Carreño
tien un Plan contra la Probeza Infantil frutu del conveniu robláu
pola Conseyería de Servicios y Derechos Sociales del Principáu
d'Asturies y el mesmu Conceyu. Les competencies en materia d'infancia
correspuenden a les Comunidaes Autónomes, implementando estes la
subvención que llega del Gobiernu Central nun 72%, apurriendo les
alministraciones locales la xestión de los programes.
Dientro d'esti Plan 16
families del Conceyu, con menores a cargu, podrán beneficiase
d'unes ayudes de 700€ caúna. Esta cuantía afítase
atendiendo a les propuestes de UNICEF en relación a la cuantía
mínima que tien d'axustase pa les prestaciones por fíu/a a cargu.
“Los Servicios Sociales
municipales van xestionar estes midíes de protección infantil de
sofitu familiar na so modalidá de prestación económica, que la so
finalidá ye procurar que les necesidaes básiques del/la menor tean
cubiertes cuando la causa determinante del riesgu pal so
desenvolvimientu integral venga de situaciones de falta o
insuficiencia de recursos del so mediu familiar” señaló
Cecilia Tascón, Concejala de Bienestar Social.
Dende la área de Bienestar Social
municipal va llevasea cabu la concesión d'estes ayudes económiques
directes a families o unidaes de convivencia con menores a cargu,
siempres qu'esista una convivencia afeutiva y los proxenitores nun
fueren privaos o suspendíos de la patria potestá y confírmese que
la unidá familiar atópase en situación de privacidá material
severa. La valoración de les solicitúes va faese atendiendo al
indicador propuestu pola Unión Europea, AROPE. Les families tendrán
de tar per debaxo d'esti indicador, que combina trés conceutos: el
riesgu de la probeza, la falta material y baxa intensidá nel empléu.
“Va Beneficiar a unidaes
familiares que nun puedan faer frente a los gastos ordinarios como:
alimentación, vistíu, suministros xenerales de la vivienda y
material escolar, siempres que la renta máxima añal de la unidá
familiar nun supere la última cuantía fita pol INE como de riesgu
de probeza. El cumplimientu de los requisitos anteriores va
acreditase por aciu informe de los Servicios Sociales” esclarió
la Concejala.
Tres la publicación de la esta
convocatoria nel Boletín Oficial del Principáu d'Asturies (BOPA),
les unidaes familiares interesaes n'aportar a estes ayudes tendrán
de presentar la solicitú en modelu normalizáu, xuntu cola
documentación acreditativa de la so situación, nel Centru de
Servicios Sociales de Carreño (C/Nicanor Piñole, 1 Candás)
nos 10 díes siguientes arteros a la so publicación, previu
pidimientu de cita.
Pa la concesión de les ayudes caúna
de les families axudicataries va tar obligada a la firma d'un
documentu de compromisos, previu a la concesión, onde se va reflexar
los conceutos nos que se va a gastar l'ayuda. La xustificación va
faese en base a los recibos o factures rellacionaes colos conceutos
indicaos nel documentu robláu. La fecha llende pa la xustificación
ye'l 15 de febreru del 2018.