Carreño amuesa la so esperiencia tecnolóxica y participativa na
Sala de Ponentes de MediaLab de Madrid nel marcu de la primer
conferencia internacional CONSUL (Software llibre pa participación ciudadana http://www.decide.es/es). Más de 30
ciudaes y conceyos, ente los que s'atopa'l conceyu carreñense, usen
esta ferramienta pa los sos procesos participativos y nesti foru
internacional punxéronse de mancomún toles esperiencies pa
collaborar, aprender, anovar y pensar sobro'l futuru. CONSULCon
enmárcase dientro de Democratic Cities y remató esti día 18 de
noviembre con una conferencia internacional na qu'intervien una
representación del Conceyu de Carreño, xuntu con activistes,
persones espertes en participación y personalidaes de too el mundu.
“Enllantar procesos de participación ciudadana rique un
cambéu de mentalidá y d'organización interna. Les instituciones
participantes nesti alcuentru fueron esplicando cómo
tán resolviendo esti desafíu” - esplicó Paula
Cuervo, Edil de Participación Ciudadana de Carreño.
En Madrid, en representación del Conceyu de Carreño,
intervieno la responsable de TIC, Tresparencia y Participación,
Ana García Fernández. La cuál participó de primeres na Mesa
“Camudo Cultural de les Organizaciones” que moderó, Gregorio
Planchuelo, Director Xeneral de Participación Ciudadana del Conceyu
de Madrid. La esperiencia llaboral de García foi siempres na
alministración Local, dende Febreru 1993 forma parte del personal
del Conceyu de Carreño. Empezó desenvolviendo les aplicaciones de
toles árees municipales lo que foi dexando conocer los
procedimientos y procesos de xestión de too el Consistoriu. Ye, amás
de técnica y esperta n'informática (Xestión) Diplomada en GAP
(Xestión y Alministración Pública). Y en la so intervención nel
foru internacional esbilló, como autora del mesmu, el procesu
d'implantación del Plan estratéxicu de Gobiernu Abiertu en Carreño.
Na mesma mesa de ponentes acompañáronlu Jorge Buriani, Director de
la División Asesoría de Desenvolvimientu Municipal y Participación
de la Intendencia de Montevideo y Alberto Bustos, Conceyal de
Participación Ciudadana, Mocedá y Deportes nel Conceyu de
Valladolid. Bustos ta venceyáu a los movimientos sociales y al
desenvolvimientu comuñal tantu dende l'ámbitu activista y militante
como dende l'ámbitu llaboral: radios comuñales, orientación
llaboral, animación socio-cultural, dinamización rural, educación
pal desenvolvimientu, economíes alternatives…
“La representante carreñense espunxo en Madrid el
desenvolvimientu del procesu de gobiernu abiertu nel nuesu conceyu.
La Técnica municipal detalló como nel añu 2016, buscamos ameyorar
el nuesu Conceyu, la so modernización, según criterios d'eficacia,
lo qu'implicó un cambéu cultural na organización y nos procesos pa
ser más tresparentes tantu na execución como na presentación de
les nueses cuentes. Y a tal fin, realizamos un Plan Estratéxicu de
Gobiernu Abiertu. Plan que tien 3 programes: Modernización,
tresparencia y participación ciudadana” – señaló la
conceyala de Participación Ciudadana de Carreño.
“El nuesu programa de Modernización, estrémase en trés
proyectos: Alministración electrónica, alministración fácil y
cero papel. A día de güei, los nuesos espedientes son totalmente
electrónicos, róblase tou digitalmente y anguaño tamos instalando
la firma del ciudadanu/a dixital que nos dexará recoyer les robles
vecinales – ensin necesidá de papel - por aciu una tablet.
Estrenemos nuevu portal Web municipal, y llueu a la nuesa see
electrónica podrá aportase al traviés de Cl@ve. Tamos integraos en
ORVE, y al 95% de cero papel. En relación a esti asuntu solo
fáltanos l'acuse de recibu ensin papel cuando realizamos
notificaciones y tamos trabayando nello. Destácase tamién que pa
les sesiones de plenu, xunta de gobiernu o comisiones informatives yá
nun se lleven los espedientes físicos, únviase electrónicamente a
cada integrante l'orde del día según les credenciales d'accesu a
tolos puntos de la convocatoria en formatu electrónicu p'aportar a
elles directamente” – añedió la conceyala.
“En relación del procesu d'implantación d'una mayor
tresparencia na xestión. Señalar qu'el nuesu principal oxetivu
siempres foi que resultara la so implantación sostenible nel tiempu,
esto ye, que casi s'alimentara de forma automática col trabayu
diariu del personal municipal. De nada sirviría cuantiosas y
costoses aplicaciones que depués non s'actualicen por falta de
medios. Tratamos de que la información, nel so mayor parte, tea en
datu abiertu, avancemos na meyora de los procesos internos pa
entornar automáticamente los datos a la ciudadanía y quédanos
siguir trabayando p'avanzar más na cantidá de información
que presentamos na parte de tresparencia de la nuesa web” –
prosiguió Cuervo.
“En relación al procesu de Participación Ciudadana, en
Noviembre de 2016, arrincó'l nuesu proyectu piloto “Aprendiendo a
Participar”. El presupuestu municipal ye la ferramienta que tien el
nuesu equipu de Gobiernu pa llevar alantre les sos polítiques y
desenvolver el so programa, pero por mesma decisión, dexemos parte
d'esta prerrogativa a los vecinos y vecines de Carreño, faciéndo-yos
copartícipe y reorientando les relaciones de poder. El compromisu
políticu foi que siquier el 30% del presupuestu disponible pa
inversiones y emplegaríase nesti proyectu piloto de Presupuestos
participativos. Afitamos un criteriu d'equilibriu que tendencialmente
rellaciona, de forma proporcional, población de cada parroquia ya
inversión pa garantizar l'equilibriu territorial nel conceyu.
Entendimos que naide meyor que'l vecinderu de Carreño pa decidir y
contribuyir a determinar directamente'l destín d'una parte de los
recursos públicos de Carreño. Esto ye, la Corporación de Carreño
voluntariamente dio poder de decisión, no qu'a les inversiones
municipales refierse, en favor de la ciudadanía otorgándo-yos
más capacidá de decisión directa pudiendo formular propuestes y
votar les más prioritaries. Nesti proyectu buscamos una mayor
eficiencia y eficacia na nuesa xestión. La eficiencia consiguióse
al afaer les inversiones a les propuestes qu'espresa'l vecinderu. Y a
la eficiencia, consíguese al traviés del control directu de la
ciudadanía al dir dándo-yos cuenta de toles fases poles que pasen
les sos propuestes” – espresó Paula Cuervo.
“La puesta en marcha d'un procesu participativu dexó claro'l
compromisu del gobiernu de Carreño col impulsu y fortalecimientu de
la participación de la ciudadanía na ellaboración de polítiques
públiques. Yá tenemos una
plataforma Decide.c@rreno (https://decide.carreno.es/)
pa recoyer les propuestes. L'añu pasáu, el vecinderu decidió
sobro'l 30,74 per cientu de les inversiones a acometer en 2017, lo
que supunxo un importe total de 300.000 euros, que s'alcordó
destinar, ente otres coses, a la construcción d'una cera que
comunique col Centru de Salú periféricu d'El Empalme en Prevera,
l'Aula de psicomotricidad pa la Escuela Infantil (0-3 años), meyores
nos equipamientos deportivos de Candás, el zarru llateral de la
pista polideportiva de Albandi y obres de meyores en caminos rurales.
Rematáu esti primer procesu de presupuestos participativos con un
11,27 % de participación (más d'un millar de persones mayores de 16
años empadronaes y residentes nel conceyu de Carreño presentaron o
votaron propuestes pa la so inclusión) siguimos trabayando
p'asegurar que'l procesu consolídese incorporando toles meyores
posibles y vamos aumentar el porcentaxe del presupuestu que se somete
a la decisión vecinal. Llueu vamos convocar el Conseyu de
Participación Ciudadana y va arrincar el segundu procesu de
presupuestos participativos. L'alderique y la reflexón colectiva
favorecieron espacios de diálogu y d'alcuentru, que fixeron posibles
alcuerdos amplios en beneficiu esclusivu del conceyu y esto
traducióse n'inversiones concretes que fueron recoyendo y van
recoyese nos los socesivos presupuestos municipales. Ye enriquecedor
participar en foros d'ámbitu supramunicipal pa intercambiar
información, conocer otres bones práctiques y arriquecer el nuesu
procesu de meyora continua” – concluyó la edil.
Albandi
