La Casa de la Cultura de Candás acueye
nestes últimes selmanes del mes de noviembre una amuesa de les
obres presentaes al XLVII Certame Nacional d'Arte de L.luarca 2016
(CNAL).
El CNAL ta entamáu pol Conceyu
de Valdés, en collaboración cola Conseyería d'Educación y
Ciencia del Principáu d'Asturies y la Fundación Caja Rural
d'Asturies.
Dos son los premios qu'otorga esti
certame; Premio Conceyu de Valdés, dotáu con 4.200€,
alquisición de la obra y diploma; Premio Fundación Caja Rural dotáu
con 2.000 €, ensin alquisición de la obra y diploma. Na XLVII
edición presentáronse un total de 110 obres. Ente los requisitos pa
poder presentase al certame, esixíase que fora una obra recién
fecha (2014-2016), en propiedá del autor/autora y que la obra nun
fuera premiada n'otru concursu.
L'amuesa que se presenta en Candás ye
una selección de 6 obres presentaes al concursu. Preséntense
en distintos formatos y técniques, d'esta forma vamos poder atopar
fotografíes, obres al oliu en llinu, técnica mista en madera,
collage, acrílicu y tinta en llenzu,.. ente les que s'atopen les
dos obres ganadores:
“El baile de las luces y las noches”
premiu Conceyu de Valdés, un collage de l'avilesina
Esther Cuesta.
“Ciudad dormitorio" de la serie
metrópolis premiu Fundación Caja Rural, una obra gráfica/pintura
del uvieín Iván Baizán.
La esposición va poder ser visitada
dende'l 21 al 29 de noviembre, dambos inclusive, na Casa de la
Cultura de Candás, Cai Santolaya, de martes a xueves 19-21
hores y sábados-Domingos 12-14 hores.