Na mañana d'esti Domingu 19 de noviembre, l'asociación vecinal de Llorgozana, que preside Roberto Bueno, celebró la so tradicional xornada d'hermandá. Casi dos centenares de persones participaron nos actos programaos. En representación del Conceyu de Carreño allegaron el conceyal de Mediu Rural y l'Alcaldesa.

El programa del alcuentru incluyó una misa a les 13:30 h. oficiada por Manuel Ángel García, cura párrocu de la localidá, na que se recordó a les persones difuntes de la parroquia.

A les 14 h. tuvo llugar la comida d'hermandá nun establecimientu de Perlora, a la qu'asistieron socios y socies. Nel intre de la velada rindióse homenaxe a dos vecinos de la localidá, Sara de “Casa Bras” y Pepe de La Machina, el cuál nun pudo asistir por razones de salú. Sí allegó una representación de la familia qu'escusó la so non asistencia. Sara Díaz Álvarez, de 84 años, recibió arropada del so fíu, nietos y bisnietos la reconocencia del vecinderu. El so bisnietu lleó unes palabres d'homenaxe rellatando la so hestoria de vida y dedicación a la familia.

L'asociación vecinal entamó tamién un sortéu de regalos ente los asistentes y anunció la organización del primer concursu de fachaes navidiegues, animando al vecinderu a decorar les sos viviendes el próximu mes d'Avientu.