Les actuaciones contemplaes consisten na
reurbanización de la cera actual pa faela accesible dexando conectar
afechiscamente la farmacia col ambulatoriu. va executase una cera de
1,80 metros d'anchu, qu'en dellos puntos va verse amenorgáu hasta
1,50 metros, va tener los vaos necesarios pa entrada a garaxes.
Replantéguense les places d'aparcamientu
cumpliendo coles dimensiones dispuestes pola Orde VIV/561/2010
incluyendo una plaza p'ambulancia y dos places reservaes pa persones
con movilidá amenorgada, según itinerarios d'accesibulidá dende
cada plaza hasta les ceres de nueva construcción.
Na zona de la ponte, nel regueru,
esaniciaráse la bionda p'aprovechar al máximu l'espaciu. La cera va
executase xusto dende'l cantu de la ponte. Va Ser necesariu asitiar
una barandiella fondiada al cantu de la llosa del mesmu pa nun
amenorgar l'anchu de la nueva cera proyectada.
La cera va bordiar la parcela del
ambulatoriu por detrás de les places en batería reservaes. Nesti
últimu tramu de cera tamién va ser necesariu asitiar una
barandiella que protexa'l desnivel esistente ente la rasante de la
carretera y la de la parcela del ambulatoriu, tal que se reflexa nos
planos de proyectu. A lo llargo de tolos tramos de cera diseñen vaos
piatonales coincidiendo colos itinerarios d'accesibilidá.
Pa la execución de les obres el Conceyu
de Carreño, en llogrando los permisos necesarios, realizó'l
procesu de llicitación. Al mesmu presentáronse 6 empreses. Les
obres fueron axudicaes a la ufierta más ventaxosa, la presentada
poña empresa ELECNOR, S.A. por importe de 18.134,48 € IVA
incluyíu. El gastu va executase con cargu a la partida 611 00
(Plan Integral de la Zona Rural).
L'actuación prevista va ameyorar
l'accesibilidá al Centru de Salú qu'atiende a bona parte de la zona
rural de Carreño. El citáu ambulatoriu atópase parcialmente
dientro del Núcleu Rural de La Cuesta, ente les parroquies de
Prevera y Carrió. La llende ente dambes parroquies ye'l regueru del
Reconco.