Carreño llogra que s'empecipie'l reglamentu d'horros y paneres del Principáu d'Asturies

L'Ayuntamientu de Carreño, a instancies de l'Asociación d'Amigos del Horru, que preside Víctor Manuel Suárez, treslladó al Gobiernu d'Asturies y a la Xunta Xeneral del Principáu la necesidá de plantegar cambeos na regulación xurídica de los horros y paneres dexando un réxime d'usos que ponga en valor estes construcciones.

Somos conscientes de la necesidá d'afaer los usos d'horros y paneres a la situación real que viven na actualidá, ensin qu'ello suponga una amenorga nos parámetros de caltenimientu d'estos bienes culturales. D'ende que recoyamos el guante de la iniciativa impulsada por Víctor Manuel Suárez y fuéramos capaces ente toos d'asitiar esti asuntu na axenda normativa del Gobiernu d'Asturies”, esplicó Amelia Fernández, Alcaldesa de Carreño.


El Conseyu de Patrimoniu Cultural alcordó los entamos de los trabayos d'ellaboración del reglamentu d'horros y paneres, en desenvolvimientu de les previsiones de la llei del Principáu d'Asturies 1/2001, de 6 de marzu, de Patrimoniu Cultural. Esti reglamentu va encetar la regulación pormenorizada de los usos a los que van poder destinase estos bienes, según los requisitos pal caltenimientu y salvaguarda de los valores culturales que los faen merecedores de la más alta protección.