José María Vega Vega, llogra 3 distinciones nel XII Campeonatu d'España celebráu apocayá n'Álora (Málaga).

La Federación Española d'Avicultura, Colombicultura y Cunicultura de Raza destacó al carreñense como Campeón de Raza Xigante Español, Subcampeón de Raza Xigante Español y como meyor Cunicultor del añu 2017, en reconocencia al so trabayu y trayectoria.  

 José María participó nesti concursu nacional con 6 exemplares: 4 femes y dos machos n'una cita, qu'axuntó a más de 1.000 exemplares procedentes de toa España nun eventu entamáu pol Conceyu de Álora y Fesacocur.

N'Álora axuntáronse más de 1.000 animales (aves, coneyos y palombos) procedentes de tola xeografía española, amás d'ufiertar un ampliu programa con clases didáctiques para escolares, concursos morfolóxicos, xornaes técniques, visites empuestes polos monumentos del conceyu, y la presencia más de 20 empreses rellacionaes col sector.

José María Vega, de  74 años, natural de Tamón y residente en La Rebollada, parroquia de Quimarán, participó anguaño 2017 en trés concursos de cunicultura alcanzando primeros premios en toos ellos: 

-AGROPEC, mientres el mes de Setiembre del añu en cursu, resultando ganador con 97 puntos y llogrando el diploma MEYOR CONEYU XIGANTE ESPAÑOL”.

-XIII FERIA INTERNACIONAL D'AVICULTURA, COLOMBICULTURA Y CUNICULTURA “ VILLA DE XIXÓN” 2017, que se celebró n'Ochobre en Xixón algamando'l 1º Premiu “ MEYOR XIGANTE ESPAÑOL”.

-XII CAMPEONATU D'ESPAÑA D'AVICULTURA, COLOMBICULTURA Y CUNICULTURA DE RAZA, celebráu nel Pabellón cubiertu Antonio Henares d'Álora, Málaga, ónde consiguió los trés títulos enantes señalaos.