Na mañana d'esti vienres 1 d'avientu,
a les 12h. nel salón d'actos del RIDEA presentóse el
Coru de “Mensajeros de La Paz”.
Pipo Prendes, músicu candasín esbilló
la idea del proyectu coral infantil que va debutar nun conciertu
“MENSAJEROS DE LA PAZ” que va tener llugar el Madrid el 7
d'Avientu a les 19:30 h. na Ilesia de San Antón.
El músicu de Candás treslladó-y al
Padre Ángel la molición de formar un Coru de Mensaxeros de La Paz
n'Asturies. El Padre Ángel sofitó dafechu la iniciativa asturiana
que tien la gran collaboración de David Colado, como Director del
Coru.
A Madrid van movese 94 músicos ente
Coru y Banda, con una notable presencia de mocedá, neños y neñes
de Carreño.
Nel actu de presentación
intervinieron: Pipo Prendes, David Colado, Dtor. de la Escuela
de Música Miguel Barrosa de Carreño que, de la mesma dirixe la
Banda Sinfónica Infantil y Xuvenil del Principáu Asturies y
el acabante de crear Coru “Mensajeros de La Paz”, Pedro Gómez,
Coordinador de Mensajeros de La Paz y Amelia Fernández, Alcaldesa de
Carreño.
“Dende principios d'esti trimestre
trabayemos intensamente cola profesora de Coru de la EM de Carreño,
Elena Rosso. Vamos Interpretar cuatro cantares con Pipo. Vamos
estrenar el tema “Mensajeros de La Paz” y otru de los sos
emblemáticos cantares “Asturianos”“ -detalló David
Colado na presentación.
L'ensayu xeneral, previu al recital, va
ser esti sábadu, de 18 a 20h. nel Centru polivalente “La Baragaña”
de Candás.
L'Alcaldesa destacó na so intervención
la importancia que tien pa Carreño, conceyu qu'ostenta'l
sellu “Ciudaes Amigues de la Infancia” pol llabor que
se vien desenvolviendo a favor de les persones menores de 18 años,
el tener un proxecto sociu educativu y musical del algame d'ésti.
“Un 12,85 % de la población nel
nuesu conceyu ye menor de 18 años, que dicha población pueda
formase musicalmente y gracies a Pipo Prendes que tamién pueda
compartir esperiencies coles persones más vulnerables y una
entidá como la presidida pol Padre Ángel ye una gran oportunidá”
-concluyó l'Alcaldesa.