Na Feria internacional de Turismu (FITUR) Carreño va promocionase
anguaño como destín turísticu polideportivu, a la presentación
d'apertura del stand cola Vuelta España, va sumase la presentación
de la campaña “LATE CARREÑO: Bienvenida de
corazón” - que nos próximos meses va llanzase nel
conceyu- y nun va faltar la promoción y espardimientu de
les marañueles de Candás, alimentos del Paraísu. Los obradores de
Candás apurrieron productos pa tastiar nel stand d'Asturies mientres
la Feria.
Candás, la capital del conceyu de Carreño, va acoyer el próximu
7 de setiembre la salida de la 13ª etapa de la Vuelta ciclista a
España, de 175,5 kilómetros de llargor, y que va escurrir ente la
villa candasina y les tarrecibles ramples del puertu de La Camperona,
nel valle de Sabero (Llión). Mientres l'actu d'inauguración
del stand de FITUR nel stand del Gobiernu del Principáu presentóse'l
percorríu de la Vuelta 2018 al so pasu per Asturies. Púsose de
manifiestu qu'esta etapa (la primera de los trés que van percorrer
Asturies) ensin dulda va contribuyir a marcar les diferencies ente
los favoritos de cara a la victoria final d'esta edición de la
Vuelta.
La salida de la etapa de la Vuelta, que per primer vegada acueye
la villa candasina, vien coronar la vocación deportiva y per ende
ciclista que caracteriza a les xentes de Candás y Carreño dende va
décades. Bastante ye que el ciclista Vicente López Carril (terceru
nel Tour de Francia de 1974, tres Eddy Merckx y Raymond Poulidor)
vivió bona parte de la so vida en Candás, y pasió arguyosu'l
llamatu de “El Candasu” pol circuitu ciclista internacional. Nel
so honor, cada añu'l Patronatu Deportivu Municipal entama un troféu
ciclista y una San Silvestre cicloturista, que lleven el so nome.
L'afición deportiva de los carreñenses tien el so reflexu nos
numberosos clubes deportivos del conceyu, de les más diverses
disciplines: dende'l fútbol hasta'l piragüismu, la vela, el
submarinismu o los deportes autóctonos asturianos. Esta
polideportiva vocación del vecinderu de Carreño llevó a que Candás
sía considerada “Villa d'Olímpicos”, porque dellos de los sos
vecinos y vecines participaron en Xuegos Olímpicos, llegando
dalgunos d'ellos a algamar la gloria de les medayes.
Carreño, por ello, nun ye namá nacencia y cantera de deportistes
d'élite: ye tamién un magníficu destín turísticu nel que pueden
esfrutar de la so vocación les persones aficionaes a les más
variaes disciplines deportives. El puertu deportivu de Candás, nesti
sentíu, constitúi un magníficu soporte pa dar sofitu y abellu a la
pesca deportiva y les actividaes náutiques, nesti casu con un
especial apuesta pol deporte inclusivu, por aciu la puesta a
disposición de veleros afechos pal esfrute de la Vela por persones
con movilidá amenorgada o diversidá funcional.
Les Víes Verdes d'El Tranquero y del Ferrocarril Estratéxicu son
otros de los recursos turísticos qu'ufierta a los amantes del
deporte Carreño, un conceyu deportivu.