Énte les últimes declaraciones feches
públiques pol voceru del grupu municipal d'Esquierda Xunida en
Carreño, la executiva local del Partíu Socialista sal al pasu de
les acusaciones feches sobro l'actitú de l'Alcaldesa de Carreño,
Amelia Fernández, en relación a la situación que traviesa la
Mancomunidá Cabu Peñes.
"La posición de l'Alcaldesa de
Carreño namá escuerre la defensa de los intereses de Carreño nel
ente supramunicipal. El voceru de la coalición tendría de faer lo
mesmo y evitar que sía'l vecinderu de Carreño quien asuma y pague
les consecuencies de la nefasta xestión de los anteriores gobiernos
de Gozón, que llevaron a la mancomunidá a la situación que vive
güei", esplicó Teresa González, secretaria de política
municipal de l'Agrupación Socialista de Carreño.
"Va Tener qu'esplicar IX el
porqué del cheque en blancu a asumir una Presidencia antes de (por
casu) esclariar les cuentes y de que Gozón reconoza'l total de delda
contraida cola Mancomunidá y comprométase de forma efectiva a
abonala al igual que los intereses de demoranza derivaos de los
impagos de Gozón. Resulta cuantimenos murniu, que sían los mesmos
grupos municipales de Carreño quien defendan los intereses de Gozón,
precisamente'l sociu que llevó a la Mancomunidá a una situación
llende. Quiciabes nun recuerden qu'amás de la situación económica,
nos últimos años agraváronse los conflictos llaborales nel senu
del ente supramunicipal, y los impagos a les empreses qu'empresten
servicios tán xeneráu reclamaciones de pagos ya interés. Nun sería
de recibu que dempués de dellos años nos que pudieron dase pasos pa
buscar soluciones, tenga que ser Carreño quien asuma les
consecuencies, toes elles negatives, por cierto", añedió
González.
“Tampoco taría de más qu'IX
esplicara por qué nun pidió la rotación mientres la llexislatura
pasada na que'l PP de Gozón ostentó la presidencia y la mesma IX la
conceyalía delegada mientres los cuatro años y porqué abandonó la
representación como vocal delegáu”, señaló la secretaria de
política municipal socialista de Carreño.
"Más allá de cuestiones
d'interpretación de los estatutos de la Mancomunidá, Carreño va
asumir la so presidencia nel mesmu intre en que Gozón reconoza y
comprométase a abonar de forma efectiva la delda contraida col ente
supramunicipal. Compromisu que tendrá de dir debidamente reflexáu
nos sos presupuestos municipales. Los grupos municipales de Carreño
tendrán d'esplicar qué intereses defenden realmente”,
concluyó la secretaria de política municipal socialista de Carreño.
Albandi
