Na so casa de Perlora, cuando dormía esti seis de
xineru, Alberto García, el de la Xixona, sobrín del escultor
candasín Antón, marchó a l'ancha plaza del más allá
dexando a Berta, la so querida esposa, a los sos fíos, nieta y
amistaes llenos de una súbita murnia y de un fondu
dolor.
Munches persones recuerden aquel Alberto mozu, entusiasta y
entamador trabayando, coldu a coldu, con Cipriano Aramendi pola
promoción cultural y festiva de la nuesa villa marinera. Cofundador
de la Sociedá de Festexos de Candás (SOFECA), a la qu'él, como
Secretariu de la mesma, apurrió-y los meyores años del so maduror,
foi xuntu con Panin alma y corazón d'aquella comisión de
fiestes llena de una entusiasta mocedá de socios y socies,
qu'anovó entós daquella, con imaxinación y aciertu los
programes de les principales festividaes del pueblu de
Candás. Munches vegaes remembraba aquelles verbenes de Santarúa y
los concursos de tonada que tantu-y gustaben. Nos últimos años,
siguió con interés la programación faciendo aportaciones al
programa festivu y collaborando con artículos nel Portfolio de
fiestes. Siempres tuvo dispuestu a collaborar en tou aquello que va
redundar en beneficiu y promoción de Candás y de Carreño.
Alberto, como representante de la familia d'Antón nel Patronatu
del Muséu Antón, caltuvo hasta la so muerte viva la memoria del so
malogrado tíu - güelu al que, de continuu, ponía
d'actualidá en les numberoses visites empuestes qu'él,
con tantu entusiasmu, entamaba al Muséu que guarda y
caltien la obra del nuesu gran escultor. Altruista ya incansable
foi'l so llabor de promoción de la obra d'Antón. Compartiendo
sesiones intenses y trabayu, coldu a coldu, na Xunta Rectora y nel
Conseyu de Xerencia.
Collaboró tamién nos eventos y aniversarios principales del club
Los Gorilas, destacando nellos les sos dotes como organizador, siendo
eficaz y rigorosu coordinando les distintes comisiones de
trabayu que para tales fines formáronse.
Na fábrica de cementos d'Aboño desempeñó bona parte de la so
etapa profesional. Ellí exerció'l so llabor actuando al empar de
maestru acuciosu, qu'acoyía y abría puertes a la esperiencia
llaboral a munches persones de Carreño.
Con Alberto sume definitivamente'l candasín d'una dómina.
L'amigu de faer favores, home bonu, que nun quixo dexar de remar pol
so pueblu hasta'l fin.
Un responsu va celebrase nel Campusantu de Perlora esti Domingu 7
de xineru a les 13,30 hores previu a la so sepultura, pa finalmente
celebrar el so funeral el llunes 8 de xineru a les 17 hores na Ilesia
Parroquial San Félix de Candás.
Descanse en paz.
Albandi
