Tolos años, na Selmana Santa, Candás ye sinónimu de
“marañuela”: ese deliciosu dulce, de forma enrevesosa, color
amarellentáu, y arume a mantequilla, que ye tan mesma de la villa de
Candás y de la so vecina Lluanco. Esta fin de selmana en el stand
d'Asturies esi arume anubrió IFEMA.
“La marañuela recuérdanos la idiosincrasia y tradiciones
marineres de Candás: non en baldre constituyía d'antiguo l'alimentu
habitual delos pescadores mientres les llargues costeres del bonitu.
Tamién se convirtió nel regalu tradicional que, en Pascua, los
padrinos y les madrines de Candás regalaben a los sos afiaos y
afiaes, colo que'l golor a marañuela trescalaba les cais de Candás
mientres los díes de la Selmana Santa. Güei, la Marañuela forma
parte por derechu propiu de los Alimentos del Paraísu Natural”, la
marca de garantía cola que'l Principáu d'Asturies da cobertoria a
la comercialización d'especialidaes agroalimentarias asturianes con
excelencia culinaria. Nel stand d'Asturies na Feria de Madrid esta
edición cobraron tamién enforma protagonismu con degustaciones
diaries” – esplicó Amelia Fernández,
Alcaldesa de Carreño.
"Na actualidá, son cuatro les empreses ellaboradores
de marañuela del conceyu de Carreño que consiguieron acoyese a esta
marca calidable estremada, a les que'l Conceyu de Carreño ufierta
una ayuda económica para compensar los gastos xeneraos por algamar
esti grau d'esixencia. La Marañuela, por ello, mereció tar presente
na 31ª edición del Salón de Gourmets, feria internacional
celebrada en Madrid el pasáu mes d'Abril y estos díes en IFEMA”
– añedió Fernández.
Tradición y espíritu entamador llevaron a les xentes de Carreño
a caltener el so ricu Patrimoniu Cultural, y coles mesmes a ponelo en
valor, ufiertando a les sos visitantes esperiencies úniques: les
actividaes de Turismu Náuticu qu'ufierta'l puertu deportivu de
Candás, o l'apertura de la Casa d'acoyida de la Familia Ferroviaria
de Tamón (basada na hestoria ferroviaria del conceyu) son dos bones
amueses de la puxanza d'un conceyu vivo y atopadizo. El próximu
miércoles día 4, el chigre y la casa d'acoyida de la familia
ferroviaria van abrir de nuevu les sos puertes al públicu na
parroquia de Tamón tres l'axudicación a una nueva
concesionaria.