Tres les declaraciones realizaes pol
Partíu Popular de Carreño en relación a la seguridá del Paséu
Marítimu de Candás el voceru del gobiernu local y responsable de la
área d'urbanismu, Gabriel Rodríguez, esplicó que “del
conteníu real del informe técnicu, que menta'l voceru popular, nun
puede, de nenguna manera, deducise qu'esista tal riesgu inminente de
desprendimientu de la coronación esistente detrás de la vivienda
que foi desallugada. Ye más, pa estenar cualquier dulda al
respective dende'l mesmu consistoriu apocayá contratóse, a mayores
y como complementu a los informes disponibles na oficina técnica
municipal, un nuevu estudiu xeolóxicu y va ser precisu evaluar la
situación actual de la zona aportando a propiedaes privaes”.
Hasta la fecha, la solicitú formulada
pol Grupu Municipal Popular ye reiteración del contenciosu aldericáu
nos resolvimientos xudiciales dictaes ensin que s'apurra nengún
elementu novedosu, polo que nesta cuestión namá hai que tar a lo
resuelto poles sentencies indicaes: la inestabilidá de la fastera na
zona indicada aníciase por causa de les obres realizaes nel inmueble
colindante, abonando los declaraos responsables a la propiedá del
inmueble sito nel númberu 6 de Cai Astilleros la cantidá envalorada
pa la contención al alcordase asina xudicialmente.
“Cuéstanos creer que'l voceru del
PP de Carreño, llicenciáu en Derechu, nun sía capaz d'entender
los resolvimientos xudiciales dictaes nesti casu, pretendiendo agora
ordenar pola so cuenta al propietariu de la fastera l'arreglu de la
mesma cuando xudicialmente declaróse que'l responsable de la mesma
nun ye él. Tratar d'un asuntu que ye cosa xulgada”- afirmó
Rodríguez
“Dende'l Conceyu buscóse siempres
el garantizar la seguridá nel paséu y tres la última inspección
de los redactores del proyectu realizáu pol Principáu emitiéronse
informes tamién pela so parte. Proyectu ésti qu'incluyó la
execución de les obres de estabilización de la fastera NE del Monte
Fuxa, y que dexaron la retirada del valláu de seguridá asitiáu na
redolada de la vivienda desallugada. En realizando les obres n'una de
les pertinentes inspecciones dichos técnicos ellaboraron un informe
técnicu nel que consideren que, nel momentu actual, la seguridá de
tránsitu de persones y bienes pol Paséu Marítimu ta totalmente
garantizada, sacantes causes de fuerza mayor. Rescampla que'l voceru
del Partíu Popular de Carreño entendió, una vegada más, lo que
quixo col únicu fin de causar una alarma infundada”, señaló'l
voceru del gobiernu local.
“Finalmente, destacar que col
oxetu de garantizar la seguridá de les persones qu'ocupen la
vivienda sita nel númberu 6 d'Astilleros yá se-yos riquió en dos
causes a la propiedá'l desallugu del inmueble p'aportar a la zona y
valorar la situación, llográndose la negativa pela so parte.
Sicasí, dende'l conceyu vamos tomar les midíes necesaries pa
garantizar la integridá de les persones”, concluyó Gabriel
Rodríguez.