Na madrugada d'ayeri llunes, el Ayuntamientu de Carreño tuvo
conocencia al traviés de los servicios d'emerxencia del 112 del
derrumbe nel telláu del edificiu na cai González Posada de Candás.
Una vegada conocíu l'incidente, el conceyu siguió con interés y
detalle la evolución de los acontecimientos y punxo a disposición
de los servicios d'emerxencia los medios riquíos pa collaborar col
vecinderu.
El detalle del derrumbe concrétase nel informe realizáu polos
servicios técnicos municipales Tres la revisión refecha del
interior y esterior del conxuntu (edificiu d'unos 60 años
d'antigüedá), nel informe asítiase la causa del mesmu, nel colapsu
de un pañu del forxáu de la cubierta del edificiu, que se
produz pol frayatu del tramu del forxáu afectáu, a metá de la lluz
del vanu de los sos viguetes, ensin apreciase incidencia dalguna del
colapsu sobro les viviendes que s'atopaben habitaes en dambos
inmuebles. Anque los escombros invadieron la vivienda asitiada sol
forxáu (2ª planta), ésta atopábase deshabitada.
“Nun primer momentu (al producise l'incidente de madrugada),
y de forma cautelar siguiendo encamientos de seguridá, procedióse
al desallugu de les families que vivíen nel inmueble. De la media
docena de families afectaes, a día de güei namá dos permanecen
agospiaes nun establecimientu hoteleru del conceyu. Dende'l Conceyu
contactemos coles propiedaes de cada edificiu y tamos en coordinación
con ellos de cara a qu'adopten les midíes necesaries que garanticen
la habitabilidad de les viviendes”, esplicó Gabriel Rodríguez,
voceru del gobiernu local y conceyal d'urbanismu.
“Magar correspuende a les propiedaes de los inmuebles
garantizar la seguridá d'éstos y adoptar les midíes oportunes pa
favorecer la torna de los sos ocupantes lo más aína, dende los
servicios sociales municipales tán evaluándose los casos de les
families más vulnerables que pudieren precisar ayudes más
específiques. Sicasí col fin de restablecer la normalidá lo antes
posible, van caltenese xuntes coles dos propiedaes pa concretar toos
estos aspeutos”, concluyó'l voceru del gobiernu local.